გუშინ გაზეთმა „ალიამ“ გამოაქვეყნა სტატია, სადაც ნათქვამი იყო, რომ მთავარი პროკურორის მოადგილესთან ლაშა ნაცვლიშვილთან ერთად გადადგომა გადაწყვიტა თბილისის პროკურორმა მაია მწარიაშვილმაც.

ლაშა ნაცვლიშვილმა გუშინვე, ხოლო მაია მწარიაშვილმა დღეს ეს განცხადება უარყვეს. ნაცვლიშვილი აცხადებს, რომ არ გადამდგარა და მისი გადაწყვეტილებების შესახებ მხოლოდ პროკურატურის ვებგვერდზე დაყრდნობა ურჩია ჟურნალისტებს, მაია მწარიაშვილმა კი აღნიშნა, რომ სამსახურში ჩვეულებრივად დადის და თანამდებობიდან წასვლას არ გეგმავს:

„არა, ტყუილია, რასაკვირველია. ჩვეულებრივად დავდივარ სამსახურში,“- განაცხადა მწარიაშვილმა „კურიერთან“ სატელეფონო საუბარში.

ამის მიუხედავად,ფაქტია, რომ მაია მწარიაშვილის შეცვლაზე სამთავრობო კულუარებში აქტიურად საუბრობენ. განხეთქილების მიზეზი ამჯერად ისაა, რომ გახმაურდა თბილისის პროკურორის მეუღლის კრიმინალური წარსული, რაზეც სოციალურ ქსელებში ხშირად მიანიშნებენ.

ამ ინფორმაციის მიხედვით, მაია მწარიაშვილის მეუღლე ვლადიმირ ომარის-ძე კიკნაძე ედ. შევარდნაძის წინააღმდეგ მოწყობილი ტერაქტის შემდეგ იძებნებოდა. 1995 წელს, ტერორისტული აქტის შემდეგ ქვეყნიდან გასული ვლადიმირ კიკნაძე ტერაქტამდე ედუარდ შევარდნაძის პირადი დაცვის წევრიც იყო.

ინფორმაციის თანახმად, ვლადიმირ კიკნაძე იგორ გიორგაძესთან დაახლოებული პირია და 1995 წელს, ტერაქტის შემდეგ, უკრაინას აფარებდა თავს, სადაც პირველად დაქორწინდა. უკრაინელი მეუღლისგან მას შვილიც ჰყავს.

მოგვიანებით, 2000-იანი წლების დასაწყისში ვლ. კიკნაძეს ძებნილის სტატუსი გააუქმდა, რის შემდეგაც საქართველოში დაბრუნდა და მაია მწარიაშვილზე დაქორწინდა. დაქორწინებამდე წყვილი მეგობრობდა.

არსებული ინფორმაციით, მისთვის ძებნილის სტატუსის მოხსნა მაშინდელი შს მინისტრის მოადგილის შალვა ჯანაშვილის დამსახურებაა, თუმცა, მაია მწარიაშვილის თანამდებობიდან გაშვება ტავად ბიძინა ივანიშვილს გადაუწყვეტია და ამ გადაწყვეტილების წინაშე, როგორც კულუარებში ამბობენ, თავად შალვა ჯანაშვილიც უძლურია.

"ნიუპოსტის" შენიშვნა: რუბრიკაში "შენი რეპორტაჟი" მკითხველის მიერ გამოქვეყნებული ეს მასალა დაშვებულია გამოსაქვეყნებლად რედაქციის მიერ.