ვოლოდიმირ ზელენსკიმ ირანის მიერ უკრაინული თვითმფრინავის ჩამოგდებასთან დაკავშირებით კიდევ ერთხელ ისაუბრა. პრეზიდენტი აცხადებს, რომ თუკი გამჭვირვალედ არ იმოქმედებს ირანული მთავრობა, ოფიციალური კიევი საერთაშორისო სასამართლოში აპირებს ჩივილს.

„მე ვიმედოვნებ, რომ საბოლოოდ, შევძლებთ ირანის ხელისუფლებისგან შედეგებზე ორიენტირებული პოლიტიკა მივიღოთ, რადგან საკითხი მხოლოდ იმას არ ეხება, რომ ისინი შავ ყუთს არ გვაძლევენ. მათ ოფიციალურ დონეზე უნდა მოიხადონ ბოდიში და კომპენსაცია გადაუხადონ დაღუპულთა ოჯახებს. ყველაფერი უნდა გააკეთონ, რაც დაგვპირდნენ, სხვა შემთხვევაში ჩვენ სხვა არჩევანი არ გვექნება გარდა იმისა, რომ საერთაშორისო სასამართლოში ვიჩივლოთ“ - აღნიშნა მედიასთან ინტერვიუში ვოლოდიმირ ზელენსკიმ.

პრეზიდენტმა აღნიშნა, რომ ოფიციალური თეირანი შავი ყუთის ჩანაწერების არ გადაცემას პანდემიას აბრალებს, მიუხედავად ამისა პრობლემა უსასრულოდ ვერ გაიყინება, რადგან უკრაინა პასუხებს დიდი ხანია ელის.

შეგახსენებთ, რომ იმ პერიოდში როდესაც აშშ-სა და ირანს შორის „თითქმის საომარი მდგომარეობა“ დადგა დღის წესრიგში, 8 იანვარს ირანულმა მხარემ შემთხვევით ჩამოაგდო უკრაინული ბოინგი TOR M1-ის ტიპის საზენიტო რაკეტით, რომლის შედეგად ბორტზე მყოფი 176 მგზავრის სიცოცხლე ემსხვერპლა. თვითმფრინავის ჩამოგდებაზე პასუხისმგებლობა ირანის რევოლუციის დამცველთა კორპუსმა აიღო.