საკონსტიტუციო ცვლილებები - ოპოზიცია პასუხისმგებლობა სრულად ივანიშვილსა და მის გუნდს აკისრებს

პოლიტიკა - 10:09, 22 Jun, 2020

693

საკონსტიტუციო ცვლილებების პროექტის პირველი მოსმენით დამტკიცება - ოპოზიციაში აცხადებენ, რომ საკონსტიტუციო ცვლილებების მიღებასა და 8 მარტის შეთანხმების შესრულებაზე პასუხისმგებლობა ახლა სრულად ბიძინა ივანიშვილსა და მის გუნდს ეკისრება.

ხელისუფლების ოპონენტები აცხადებენ, ქვეყნის მთავარ კანონში ცვილებებს მეორე და მესამე მოსმენით მხარს არ დაუჭერენ, თუ პოლიტპატიმარი გიორგი რურუა საპატიმროს არ დატოვებს.

"საკონსტიტუციო ცვლილებები იქნება უზრუნველყოფილი, იქცეს კონსტიტუციურ კანონად. ამისთვის "ნაციონალური მოძრაობა" ყველაფერს გააკეთებს. თუ გაათავისუფლებს ივანიშვილი პატიმრობიდან გიორგი რურუას, რომელსაც იარაღი ჩაუდო, ხო მისთვის უკეთესი, გათავისუფლება ეს ადამიანი ოთხ თვეში", - ამბობს "ნაციონალური მოძრაობის" პოლიტსაბჭოს თავმჯდომარე ნიკა მელია. "ევროპული საქართველოს" წევრის, ოთარ კახიძის თქმით, ხელისუფლებამ უნდა გადადგას ნაბიჯები, ივანიშვილი და მისი გუნდი გონს უნდა მოეგოს და რურუა გაათავისუფლოს.

"გიორგი რურუა კვლავ არის ციხეში, შესაბამისად, 8 მარტის შეთანხმება არ არის შესრულებული. საკონსტიტუციო ცვლილებებს ჩვენ არ დავუჭერთ მხარს, თუ შეთანხმება სრულად არ შესრულდება. ამიტომ ველოდებით ხელისუფლებისგან ნაბიჯებს, რომ მოეგოს ივანიშვილი გონს და გაათავისუფლოს რურუა. ჩვენ პირველ მოსმენაზე მხარდაჭერით, ქართულ ოცნებას კიდევ მივეცით დამატებით დრო, რომ რეალური ნაბიჯები გადადგას პოლიტიკური დევნის მიმართულებით", - ამბობს "ევროპული საქართველოს" პოლიტსაბჭოს წევრი ოთარ კახიძე.

ცნობისთვის, საკონსტიტუციო ცვლილებები პარლამენტმა მიიღო. "ევროპულმა საქართველომ" ცვლილებებს პირველი მოსმენით მხარი დაუჭირა. პოლიტიკური გადაწყვეტილება პარტიამ კი იმით ახსნა, რომ თუ პროექტი პირველი მოსმენით ჩავარდებოდა, მისი ხელახლა განხილვის დაწყება პარლამენტში ვეღარ მოხდებოდა და პროპორციულ სისტემაზე გადასვლის შანსიც კი აღარ არსებობდა.