გასული წლის 20 ივნისის ღამეს დაზარალებულმა მაკო გომურმა პარლამენტთან მიმდინარე აქციაზე შეკრებილებს ემოციურად მიმართა.

მისი თქმით, ძალიან რთულია მისთვის რუსთაველზე დგომა.

"ძალიან ენერგიულად მოვედი დღეს, რომ ბოლომდე ძალიან კარგად შევძლებდი, თუმცა ახლა ვხდები, ძალიან რთული ყოფილა ისევ, 1 წლის შემდეგ აქ დგომა"- განაცხადა გომურმა და თანადგომისთვის მოსახლეობას მადლობა გადაუხადა.

"ეს საშინელი 1 წელი თქვენთან ერთად გამოვიარე იმიტომ, რომ ყოველთვის გაინტერესებდათ და ყოველთვის დარდობდით, როგორ ვიქნებოდი მე, რა წინსვლა იქნებოდა. ზუსტად 1 წელი გავიდა 20 ივნისიდან. ერთი წლის უკან ასე ვიდექი, ზუსტად იგივე ტანსაცმელი მეცვა და როგორც ახლა ვქმნი რაიმე საფრთხეს თქვენთვის, სამართალდამცველებისთვის ან იმ შენობისთვის, მაშინაც ასეთ საფრთხეს წარმოვადგენდი, თუმცა როგორც ჩანს, ეს არ იყო საკმარისი ერთ-ერთი სამართალდამცველისთვის და მესროლა. მესროლა და გაჩნდა შეკითხვა - რატომ? ეს ის შეკითხვაა, რომელზეც 1 წლის განმავლობაში პასუხი ვერ მივიღე, არადა რეალობა ხომ მარტივია, უნდა მივიღო საკუთარი წილი სამართალი, თუმცა სხვა რეალობაც გვაქვს, რომელიც არის ჩემ წინ პარლამენტის შენობაში, რომლებიც ყოველ წამს ცდილობენ, რომ თავიანთი „ტრიუკებით", თვიანთი რეპლიკებით ჩვენი სახელი გააფუჭონ საზოგადოებაში"- თქვა დაზარალებულმა.

გომურმა სახელისუფლებო ტრიტორიკა მკაცრად გააკრიტიკა:

"იმის თქმასაც ბედავენ, რომ აღარ ახსოვთ, რა მოხდა 20 ივნისს და ჩვენი თვალები არის მეორეხარისხოვანი და პირველხარისხოვანი იყო ის, რომ მათ შტურმი აარიდეს პარლამენტს. კითხვა მიჩნდება - ჩემი თვალის ამოთხრით, გიორგის თვალის ამოთხრით, დათოს თვალის ამოთხრით და უამრავი თვალებით რომელი შტურმი აარიდეს პარლამენტს? რას უშლიდათ იქ ჩვენი დგომა? ჩვენი მშვიდობიანი პროტესტი? უამრავი კითხვაა, რაზეც პასუხები არ მაქვს და ეს კითხვები უფრო და უფრო მატულობს, თუმცა იმედი მაქვს, რომ თქვენთან ერთად ბრძოლით და თქვენი ანთებული გულებით ზუსტად შევძლებ ამ ბრძოლის ბოლომდე მიყვანას და ამბრძოლაში მე ვიქნები გამარჯვებული... ძალიან მიყვარხართ ყველა და ერთი გვახსოვდეს ყველას, არასდროს არ შევეგუებით საქართველოში იმ ქვეყნის ბატონობას, რომელიც დღემდე გვართმევს ტერიტორიებს და დღესაც გვპარავს ადამიანებს“, - განაცხადა გომურმა.