შს მინისტრის მოადგილე, ვახტანგ გომელაური, ზუგდიდში პატრულ-ინსპექტორის დაჭრის ფაქტს გამოეხმაურა და აღნიშნა, რომ გამოძიება დეტალებს აუცილებლად გაარკვევს:

"როგორც მე ვიცი, დაკავებულია პიროვნება, რომელმაც ეს ჩაიდინა. რა და რის გამო მოხდა, ამაზე გამოძიება მიმდინარეობს და დაადგენენ", - განაცხადა გომელაურმა.

შეგახსენებთ, რომ გუშინ, დაახლოებით შუადღის 12:00 საათზე ზუგდიდში, პრეზიდენტის რეზიდენციის მიმდებარე ტერიტორიაზე პატრულ-ინსპექტორი გოგა ანჩაბაძე დაჭრილი იპოვეს. მას ჭრილობები ბასრი საგნით ჰქონდა მიყენებული. გამოძიებამ დაადგინა, რომ ანჩაბაძეს მისი მეგობარი კონსტანტინე გულორდავა გაუსწორდა პირადი ანგარიშსწორების მიზნით, გულორდავას მეუღლის მიერ მიცემული ჩვენების თანახმად, ორი დღის წინ ანჩაბაძე მის გაუპატიურებას ცდილობდა. გულორდავას გამოძიება ჯანმრთელობის განზრახ ნაკლებად მძიმე დაზიანებას ედავება. იგი ამ დროისათვის პატიმრობაში იმყოფება.