"სანახევრო გადაწყვეტილება, ისინი მაინც სპეკულირებენ და ვაჭრობენ" - მდინარაძე "ევროპული საქართველოს" გადაწყვეტილებაზე

პოლიტიკა - 16:50, 20 Jun, 2020

386

ქართული ოცნების ერთ-ერთი ლიდერი, მამუკა მდინარაძე საკონსტიტუციო ცვლილებებთან დაკავშირებით "ევროპული საქართველოს" გადაწყვეტილებას გამოეხმაურა და განაცხადა, რომ ეს სანახევრო გადაწყვეტილებაა.
მდინარაძე "ევროპულ საქართველოს" მოუწოდებს განაცხადონ, რომ ცვლილებებს სამივე მოსმენაზე მხარს დაუჭერენ .

„შეთანხმების ნაწილი რომელიმე პატიმრის გათავისუფლება და მითუმეტეს მისთვის პოლიტპატიმრის სტატუსის მინიჭება, ნამდვილად არ ყოფილა. ხომ ყველა ვთანხმდებოდით იმაზე, რომ პროპორციულთან მიახლოებული სისტემა არის გაცილებით კარგი ქვეყნის განვითარებისა და დემოკრატიისთვის? ამ არგუმენტმა არ უშველა მათ გადაწყვეტილებას, არ მიეხმარა მათ გადაწყვეტილების მიღებაში. არც 8 მარტის შეთანხმების რეალურმა ტექსტმა უზრუნველყო ეს სამწუხაროდ, მაგრამ მაინც კარგია, რომ ფასილიტატორი ელჩების კონკრეტულმა და მკაფიო მოწოდებამ გაჭრა. მათ მიიღეს ის გადაწყვეტილება, რაც ისედაც უნდა მიეღოთ, ამ ყველაფრის გარეშე. ამ გადაწყვეტილებას შეიძლება დავარქვათ სანახევროდ მიღებული გადაწყვეტილება. ისინი მაინც სპეკულირებენ და ვაჭრობენ. ჩვენი გუნდის არაერთმა წევრმა თქვა, რომ მათ მოუწევთ საკონსტიტუციო ცვლილებების მხარდაჭერა და მგონია, რომ ასევე მოუწევთ მეორე და მესამე მოსმენების დროსაც მხარდაჭერა. ეს არ შეეხება რომელიმე ერთ ან ორ პიროვნებას, ეს არ შეეხება რაიმე საკითხს, რომელიც მხოლოდ მათ აინტერესებთ. ეს შეეხება ქვეყანას, კონსტიტუციას, მომავალს და დემოკრატიულ განვითარებას. ამით სპეკულირება და შეთანხმების რეალური ტექსტის სხვაგვარი ინტერპრეტირება არავის გაუვა. ძალიან კარგია, რომ მათ ეს გადაწყვეტილება მიიღეს, ელჩების მოწოდების შესაბამისად, თუმცა სანახევრო გადაწყვეტილება არ არის პასუხისმგებლიანი. პასუხისმგებლიანი გადაწყვეტილება იქნება, თუ ისინი იტყვიან, რომ საკონსტიტუციო ცვლილებებს სამივე მოსმენაზე დაუჭერენ მხარს,“ - განაცხადა მდინარაძემ.
ცნობისთვის, "ევროპული საქართველოს" გადაწყვეტილებით, ისინი საკონსტიტუციო ცვლილებებს პირველ მოსმენაზე მხარს დაუჭერენ და დაელოდებიან 8 მარტის შეთანხმების შესრულებას პოლიტპატიმრების გათავისუფლებაზე, რის შემდეგაც გადაწყვეტენ მეორე და მესამე მოსმენაზე დაუჭირონ თუ არა ხმარი.