საქართველოს რეგიონული განვითარებისა და ინფრასტრუქტურის სამინისტრო თვითმმართველობის კოდექსს 13 ნოემბერს, ზუგდიდელებს წარუდგენს და დაგეგმილ სიახლეებს მათთან ერთად განიხილავს.

შეხვედრა ზუგდიდის თეატრში 13 საათზე დაიწყება და მასში რეგიონული განვითარების მინისტრი დავით ნარმანია, მინისტრის პირველი მოადგილე თენგიზ შერგელაშვილი, მთავრობის კანცელარიის რეგიონებსა და თვითმმართველობებთან ურთიერთობის დეპარტამენტის უფროსი ირაკლი მელაშვილი, ადგილობრივი ხელისუფლებისა და ზუგდიდის სამოქალაქო საზოგადოების წარმომადგენლები მიიღებენ მონაწილეობას.

ზუგდიდი ერთ-ერთი ის ქალაქია, რომელსაც, რეფორმის შედეგად, თვითმმართველი ქალაქის სტატუსი მიენიჭება, მიეცემა უფლებამოსილებები და ექნება საკუთარი ბიუჯეტი, რომელიც მთლიანად ქალაქის განვითარებას მოხმარდება. აღსანიშნავია, რომ ზუგდიდისთვის ქალაქის სტატუსის მინიჭების მოთხოვნით ზუგდიდელებმა რამდენიმე ათასი ხელმოწერაც შეაგროვეს.

შეხვედრაზე, ასევე, ყურადღება გამახვილდება თემებში თვითმმართველობის განხორციელების საკითხებზეც. როგორც ცნობილია, თვითმმართველობის კოდექსის შესაბამისად, თვითმმართველი ქალაქების მიმდებარე სოფლებისგან ჩამოყალიბდება თემები, რომლის ბაზაზეც ფორმირდება მუნიციპალიტეტები. თვითმმართველი ერთეულების (ქალაქებისა და მუნიციპალიტეტების) მმართველი რგოლები იქნება არჩევითი. ასევე, განისაზღვრა ფისკალური დეცენტრალიზაციის გრძელვადიანი ხედვა, რაც თვითმმართველობებს მეტ ფინანსურ რესურსს გაუჩენს.

თვითმმართველობის კოდექსი საქართველოს მთავრობამ 30 ოქტომბრის სხდომაზე დაამტკიცა, ხოლო პარლამენტის ბიურომ პროექტი დღევანდელ სხდომაზე პლენარული სხდომების დღის წესრიგში შეიტანა. მის საკომიტეტო განხილვებს საქართველოს პარლამენტი უახლოეს მომავალში დაიწყებს.