ავლაბარში, 29-ე ბაგა-ბაღის წინ ამ დროისთვის ხმაური და გაწევ-გამოწევაა, ადგილზე მობილიზებულია საპატრულო პოლიცია.

10:00 საათზე 29-ე ბაგა-ბაღის კოლექტივმა ბაღის წინ საპროტესტო აქცია დაიწყო.

კოლექტივი ახალი დირექტორის, ქეთევან ბეჟანიშვილის დირექტორის მოვალეობის შემსრულებლად დანიშვნას და ოლიმპიური ჩემპიონის, რამაზ ნოზაძის დედის ლალი ნოზაძის განთავისუფლებას აპროტესტებენ.

ლალი ნოზაძე ბაგა-ბაღს 35 წელი ხელძღვანელობდა. მის გათავისუფლებას ბაღის კოლექტივი რამაზ ნოზაძისადმი ქალაქ თბილისის მერის გიგი უგულავას პირად ანგარიშსწორებას უკავშირებს.

„ნიუპოსტი“ კომენტარისთვის ლალი ნოზაძეს დაუკავშირდა, რომელმაც განაცხადა, რომ ამ წუთებში ბაღის წინ 400-დე ადამიანია შეკრებილი მის მხარდასაჭერად, თუმცა, თავად სახლშია და აქციაში არ მონაწილეობს:

„35 წელი ვემსახურე ამ ბაღს და მთელი რაიონი თითქმის ჩემი გაზრდილია. იქ აღმზრდელები, მშობლები და მოსახლეობაა შეკრებილი. ერთი შენიშვნა არ მაქვს მიღებული 35 წლის განმავლობაში, ეს ყველამ იცის. წინა კვირას შემოწმება შემოვიდა და მათ მაშინვე თქვეს, ჩვენ აქ ამ ქალბატონის მოსახსნელად ვართ მოსულებიო“, - უთხრა „ნიუპოსტს“ ლალი ნოზაძემ.