"ოქრუაშვილი "გრუ-ს" აგენტი... ბურჯანაძე, სანიკიძე, ნათელაშვილი და სხვები - პრორუსები" - ირაკლი კობახიძის მორიგი თავდასხმა ოპონენტებზე

პოლიტიკა - 09:59, 18 Jun, 2020

486

ჟურნალისტ გიორგი გაბუნიას მკვლელობის მომზადების საქმეზე საუბროსას ირაკლი კობახიძე ისევ ოპოზიციას აკრიტიკებს და ამბობს, რომ ქვეყანაში არასტაბილურობის განცდა ოპოზიციას აწყობს.
მეტიც "ქართული ოცნების" ლიდერი ოპონენტებს რუსეთთან კავშირში ადანაშაულებს:

„ის, რაც ხდება ამ ფაქტის გამოვლენის შემდეგ, ეს ხელს აძლევს რუსეთის ფედერაციას. დესტაბილიზაციის ნებისმიერი მცდელობა ზის პირდაპირ რუსეთის ფედერაციის ინტერესებში. ასევე ქვეყნის შიგნით არიან ძალები. ცოტა ხნის წინ ციხიდან საპრეზიდენტო აქტით "გრუ"-ს აგენტი, რომელიც დღეს „ნაციონალურ მოძრაობასთან“, „ევროპულ საქართველოსთან“ და სხვა ე.წ. დასავლურ ძალებთან ერთად ზის მოლაპარაკების მაგიდასთან. ამაში ირაკლი ოქრუაშვილს ვგულისხმობ, მაგრამ იქ არის ბურჯანაძე, გუბაზ სანიკიძე, შალვა ნათელაშვილი და სხვები, რომლებსაც არაერთხელ გაუკეთებიათ პრორუსული და ანტიდასავლური განცხადებები. დღეს ეს პოლიტიკური ძალები ერთად სხედან და ერთი მიზანი აქვთ როგორმე შეცვალონ ხელისუფლება, ანუ პირდაპირ რუსული კვალი, ძალა იკვეთება იმ ოპოზიციაში, რომელიც „ლეიბორისტული პარტიის“ ოფისში იკრიბება. აქედან გამომდინარე ინტერესების თანხვედრა აბსოლუტურად ლოგიკურია და ამაზე მსჯელობა აუცილებელია“, - განაცხადა კობახიძემ "პალიტრანიუსის" გადაცემაში.