"დონალდ ტუსკი შეცდომაშია შეყვანილი"- "ოცნება" მაღალჩინოსნების კრიტიკას ისევ ლობისტებს უკავშირებს

პოლიტიკა - 13:04, 18 Jun, 2020

386

ევროპის სახალხო პარტიის თავმჯდომარე დონალდ ტუსკი შეცდომაშია შეყვანილი - ასე აფასებს ადამიანის უფლებათა დაცვის კომიტეტის თავმჯდომარე სოფო კილაძე მაღალჩინოსნის უმწვავეს განცხადებას.

კილაძე აცხადებს, რომ ოპოზიცია აქტიურად ეწევა ლობისტურ საქმიანობას, რაც ქვეყნის იმიჯს აზიანებს.

"ჩვენ ვნახეთ დაახლოებით ერთი კვირის წინ, თითქოს რამდენიმე კონგრესმენს განეცხადებინოს, რომ ბატონი ივანიშვილი არის პუტინის აგენტი. შემდეგ გამოვიდა ერთ-ერთი კონგრესმენი და თქვა, რომ მან არ იცოდა, რა ეწერა იმ დოკუმენტში. მე მგონია, რომ დაახლოებით იგივე შემთხვევასთან გვაქვს საქმე.

გასაგებია, რომ ბატონი ტუსკი „ტვიტერზე“ წერს, მაგრამ ეს არ ნიშნავს, რომ ის არ არის შეცდომაში შეყვანილი ისევე, როგორც ის კონგრესმენი იყო. ჩვენ, სამწუხაროდ, ჩვენი ოპონენტების ლობისტურ საქმიანობას ვხედავთ, რომელიც აზიანებს ქვეყნის იმიჯს. იქამდე, სანამ არ იქნება სასამართლოს კონკრეტული გადაწყვეტილება ბატონ რურუაზე ამ კონკრეტულ საქმეზე, რაზეც ბრალი აქვს წაყენებული, ვერ გავაკეთებ ვერანაირ განცხადებას, მაგრამ ფაქტი ერთია - სამწუხაროდ, ამ ქვეყანაში შეიძლება იყოს ხალხის ფულის, 50 მილიონი ლარის ქურდი და ის მონათლონ პოლიტიკურ დევნილად, მათ შორის აქტიური ლობისტური საქმიანობით ქვეყნის გარეთ. ეს ძალიან სამწუხაროა," - განაცხადა კილაძემ.

"შეშფოთებული ვართ იმის გამო, რომ გიორგი რურუა კვლავ ციხეში რჩება. მოვუწოდებთ 8 მარტის შეთანხმების სრულად შესრულებისა და რურუას გათავისუფლებისკენ“- წერს ტუსკი სოციალურ ქსელში.