"ადმინისტრაციულ სამართალდარღვევთა კოდექსში" ინიცირებული ცვლილების მიხედვით, მძღოლი, რომელიც უარს იტყვის ალკოჰოლური ან ნარკოტიკული თრობის ტესტის გავლაზე, 3 წლით მართვის უფლების ჩამორთმევით დაისჯება.

მძღოლი, რომელიც ალკოჰოლური თუ ნარკოტიკული სიმთვრალის დასადგენად შემოწმებაზე უარს იტყვის, სამი წლის ვადით, მართვის უფლებას დაკარგავს.

ასეთ შემთხვევებზე, მოქმედი კანონმდებლობით, მძღოლებს 500-ლარიანი ჯარიმის გადახდა უწევთ, თუმცა შინაგან საქმეთა სამინისტრომ პარლამენტს კანონმდებლობის გამკარების ინიციატივით მიმართა და ურჩი მძროლებისთვის სამი წლის ვადით მართვის უფლების ჩამორთმევის წინადადებით გამოვიდა. ცვლილებები შედის.

მკაცრდება კანონმდებლობა მძოლებისთვის, რომლებსაც სატრანსპორტო საშუალების მართვის უფლება არ აქვთ, ან ჩამორთმეული აქვთ და სიმთვრალის დასადგენად შემოწმებას თავს არიდებენ. აღნიშნული კატეგორიის მძღოლების ასეთი ქმედება 2000-ლარიან ჯარიმასთან ან 15-დღიან ადმინისტრაციულ პატიმრობასთან იქნება დაკავშირებული.

როგორც შინაგან საქმეთა მინისტრის მოადგილე ლევან იზორიამ ადამიანის უფლებათა დაცვის საპარლამენტო კომიტეტის სხდომაზე განმარტა, ამ მიმართულებით პასუხისმგებლობის გამკაცრება ნასვამობისთვის 200-ლარიანი ფულადი ჯარიმის 6-თვის ვადით მართვის უფლების შეჩერებით შეცვლას უკავშირდება.

"თუკი პირს ეცოდინება, რომ შემოწმებისთვის თავის არიდების გამო მას მხოლოდ 500 ლარის გადახდა მოუწევს და ამით მართვის უფლებას შეინარჩუნებს, რა თქმა უნდა, შეეცდება შემოწმებას თავი აარიდოს", - განაცხადა ლევან იზორიამ.

მისივე თქმით, სტატისტიკის მიხედვით, მიმდინარე წლის განმავლობაში 200 შემთხვევა დაფიქსირდა, როცა მძღოლს შემოწმების შედეგად 200 ლარის გადახდა უწევდა, თუმცა შემოწმებას თავი აარიდა და 500 ლარი გადაიხადა.