გორის მუნიციპალიტეტში სათბობით უზრუნველყოფისთვის დახმარებას 7100 ოჯახი მიიღებს. ამ ოჯახებს შეეძლებათ ეს თანხა გამოიყენონ როგორც შეშის შესაძენად, ისე ელექტროენერგიით გასათბობად.

გამყოფი ხაზის სიახლოვეს მცხოვრებთა ნაწილი აცხადებს, რომ ეს თანხა ზამთრის გასატარებლად საკმარისი არ არის. მოსახლეობის ნაწილი ხეხილის ბაღებს ჩეხს. ამჟამად გორის ბაზარზე ერთი სატვირთო მანქანა შეშა 700 ლარი ღირს, 200 ლარით კი მხოლოდ ვილისის მარკის მანქანაში დატვირთული შეშის შეძენაა შესაძლებელი.

გორში „ნაციონალური მოძრაობის“ თავმჯდომარე ზვიად ხმალაძე აცხადებს, რომ შეუძლებელია ამ თანხით მოსახლეობამ გამოიზამთროს.

მისი თქმით, წინა ხელისუფლების მმართველობის პერიოდში სოფლებში 2 კუბური მეტრი შეშა შეჰქონდათ და ისიც ბოლომდე საკმარისი არ იყო.