აშშ-ის ელჩი საქართველოში, კელი დეგნანი აცხადებს, რომ ზაფხულს საქართველოს გაცნობაში გაატარებს.

მისი თქმით, ამერიკელი ტურისტები საქართველოში ჩამოსვლის შესაძლებლობას მოუთმენლად ელიან. ამის შესახებ კელი დეგნანმა, პრემიერმინისტრისა და საქართველოში აკრედიტებულ დიპლომატიური კორპუსის წარმომადგენლებთან შეხვედრის შემდეგ განაცხადა.

"ეს იყო ძალიან გრძელი სამი თვე ყველასთვის. ისეთი შეგრძნება მაქვს, რომ ახლა ვიწყებ სამუშაო მოვალეობების შესრულებას, რადგან ეპიდემია ჩემო ჩამოსვლისთანავე დაიწყო. მაგრამ ის, რის მოწმენიც ჩვენ გავხდით, ყოველთვის გვაერთიანებს ისე, როგორც ეს მხოლოდ კრიზისს შეუძლია. ადამიანები მთელი მსოფლიოს მასშტაბით გულუხვად ეხმარებოდნენ ერთმანეთს, დარწმუნებული ვარ, რომ ეს ასე გაგრძელდება მიუხედავად იმისა, თუ რა გველის წინ. ვიცი, რომ ამერიკელი ტურისტები მოუთმენლად ელიან საქართველოში ჩამოსვლის შესაძლებლობას. მე პირადად ერთი სული მაქვს მოვიარო საქართველო. ასე რომ, მე ნამდვილად მოვუსმენ პრემიერ-მინისტრის მოწოდებას. ეს არის ჩემი ზაფხული, რომელსაც საქართველოს გაცნობაში გავატარებ", — განაცხადა კელი დეგნანმა