კონგრესმენის პასუხი „ქართულ ოცნებას“ – „ამ დოკუმენტზე მუშაობდა 70 რესპუბლიკელი, მათ შორის არცერთი ლობისტი არ იყო“

პოლიტიკა - 19:35, 15 Jun, 2020

865

13 ამერიკელი კონგრესმენის მონაწილეობით შედგენილ სტრატეგიულ დოკუმენტზე, სადაც საუბარია ბიძინა ივანიშვილზე, როგორც პუტინის მოკავშირეზე, რომლის წინააღმდეგაც კონგრესმენები სანქციების დაწესებას ითხოვენ, კომენტარი გააკეთა ერთ-ერთმა კონგრესმენმა დონ ბეიკონმა.

კონგრესმენი კატეგორიულად უარყოფს ინფორმაციას იმის შესახებ, რომ კონგრესმენების მხრიდან დოკუმენზე ხელმოწერა ლობისტების მეშვეობით მოხდა.

„ნიუპოსტი“ გთავაზობთ ამონარიდს კონგრესმენის ინტერვიუდან, რომელიც მას ჟურნალისტმა ოლეგ კუროპტევმა ონლაინ-გადაცემა „სასაზღვრო ზონაში“ [ Пограничная ZONA] დაუსვა.

ოლეგ კუროპტევი: გასაგებია, რუსეთში, საქართველოში და ზოგიერთ სხვა ქვეყანაში, როგორც კი ეს დოკუმენტი გამოჩნდა, განაცხადეს, რომ აშშ-ი ლობისტებმა მოახდინეს ამ დოკუმენტის ინიცირება და აიძულეს ამერიკელი კონგრესმენები ის შეემუშავებინათ და ხელი მოეწერათ? გხოვთ გვითხრათ, აქვთ კი აშშ-ში ლობისტებს ისეთი ძალა, რომ აიძულონ 13 რესპუბლიკელი კონგრესმენი რაღაც დოკუმენტზე ხელი მოაწერონ?

დონ ბეიკონი: არა. მე არ მისაუბრია არცერთ ლობისტთან ამ დოკუმენტზე. მინდა დავაზუსტო - მასზე მუშაობდა ჯგუფი, თუ არ ვცდები 70 რესპუბლიკელი, ერთად მუშაობდნენ ამ დოკუმენტზე. ჩვენ ვიზიარებთ ერთ ღირებულებებს. მე უნდა ხაზგასმით ვთქვა, მე მჯერა ჩვენი ქვეყნის, მჯერა ჩვენი ღირებულებების თავისუფლებების, ადამიანის ღირსებისა და კანონის უზენაესობის შესახებ, მე მჯერა სხვა ქვეყნებთაბ თანამშრომლობის, რომლებიც ამავე ღირებულებას იზიარებენ. მე მჯერა, რომ რუსეთი, ჩინეთი, ირანი, ჩრდილოეთ კორეა, არ იზიარებენ ამ ღირებულებებს, ცდიობენ ისინი შეარყიონ. მე ვთცლი, რომ თავისუფალი ქვეყნები უნდა თანამშრომლობდნენ, რომ წინ აღუდგნენ მათ. ეს არის ჩემი ხედვა და იმ რესპუბლიკელთა ხედვა, ვინც ხელი მაოწერა ამ დოკუმენტს. არ იყო არცერთი ლობისტი, რომელმაც მე მთხოვა, რომ ხელი მომეწერა ამ დოკუმენტისთვის. მე პირველ რიგში ვმუშაობ ლუიზიანას კონგრესმენ ჯონსონთან ერთად და კონგრესმენ ბრაიან ბაბინთან ერთად, ისიც სამხედრო-საჰაერო ძალებიდანაა, როგორც მე. მე ვიმუშავე ძალიან ბევრ ადამიანთან ერთად ამ დოკუმენტზე, და მათ შორის არცერთი ლობისტი არ იყო.

საპარლამენტო უმრავლესობის ერთ-ერთი ლიდერი ირაკლი კობახიძე აშშ-ის კონგრესის წარმომადგენლობითი პალატის რესპუბლიკური პარტიის წევრებისგან შემდგარი სამუშაო ჯგუფის მიერ გამოქვეყნებულ ანგარიშს “დაბალი რანგის დოკუმენტი” უწოდა.

იგი აცხადებდა, რომ "ოცნება" არ იყენებს მუშაობის იმ მეთოდებს, რომელსაც იყენებს „ნაციონალური მოძრაობა".

„ეს არის ლობისტების დამსახურებით ჩაწერილი ფრაზები საკმაოდ დაბალი რანგის დოკუმენტში, რომელიც გუშინ იყო წარმოდგენილი“ - განაცხადა კობახიძემ.

აშშ-ის კონგრესის წარმომადგენლობით პალატაში რესპუბლიკური პარტიის წევრების კოკუსმა (სამუშაო ჯგუფმა — რესპუბლიკურმა კვლევის კომიტეტმა (RSC-მა)) 10 ივნისს გამოაქვეყნა ეროვნული უსაფრთხოების ახალი სტრატეგია. დოკუმენტის სათაურია „ამერიკის გაძლიერება და გლობალურ საფრთხეებთან ბრძოლა“. ანგარიშში სხვა საკითხებთან ერთად საქართველოზეც არის საუბარი.

კერძოდ, 13 ამერიკელი კონგრესმენი ახლად გამოქვეყნებულ სტრატეგიაში ბიძინა ივანიშვილისთვის, როგორც „ვლადიმერ პუტინის ახლო მოკავშირისთვის“, სანქციების დაწესებას ითხოვს.

"რუსეთის მიმართ სანქციები მისი დეზინფორმაციული კამპანიის ლიდერების წინააღმდეგაც უნდა გავრცელდეს. იგივე ახალი სანქციები უნდა იყოს გამოყენებული სახელმწიფოს მიერ მხარდაჭერილ პროპაგანდისტებზე, როგორიც შემოთავაზებული იყო ჩინეთის შემთხვევაში, კერძოდ რუსეთის პროპაგანდის უფროსებზე და ასევე რუსეთის მოკავშირეებზე სხვა ქვეყნებში, რომლებიც პუტინის სასარგებლოდ მოქმედებენ.

მაგალითად, ამისთვის საჭირო იქნებოდა კანონმდებლობა, რომელიც დააწესებდა სანქციებს ამ ახალი უფლებამოსილების შესაბამისად ვლადიმერ იევტუშენკოვზე, რუს მილიარდერ ოლიგარქზე. დამატებით, არსებული სანქციები საკმარისად არ ეხებიან პუტინის საგარეო მოკავშირეებს, რომლებიც ყოფილი საბჭოთა ქვეყნების სუვერენიტეტს უთხრიან ძირს. ბიძინა ივანიშვილი, საქართველოს უმდიდრესი ადამიანი, პუტინის ახლო მოკავშირეა და რუსეთის სასარგებლოდ საქართველოს დესტაბილიზაციაშია ჩართული. ვიქტორ მედვედჩუკი პრორუსი ოლიგარქი და მოკავშირეა უკრაინაში, რომელიც იყენებდა თავის მედია იმპერიას ქვეყანაში ზიანის მომტანი რუსული დეზინფორმაციის გასავრცელებლად.

უფრო მეტიც, სახელმწიფო დეპარტამენტმა უნდა შეიმუშავოს ანგარიში, რომელიც ჩამოთვლის კრემლთან დაკავშირებულ ოლიგარქებს, რომლებიც აფინანსებენ რუსეთის სამხედრო აგრესიას მოკავშირე და დაქირავებული არმიების საშუალებით. ასეთი ანგარიში სასარგებლო იქნებოდა კონგრესისთვის, რადგან კონგრესს განესაზღვრა სამომავლო სანქციები და ინდივიდებსა და ორგანიზაციებს კრემლთან მუშაობაზე ხელს ააღებინებდა",- წერია ანგარიშში.

ანგარიშს ხელს აწერენ კონგრესმენები: მაიკ ჯონსონი, ჯო უილსონი, რობ უიტმენი, ენ ვაგნერი, ალექს მუნი, დონ ბეკონი, ჯეკ ბერგმანი, ნილ დანი, ქლეი ჰიგინსი, რალფ ნორმანი, დენ ქრენშოუ, ბრაიან სტილი და მაიკლ უოლტზი