პარლამენტის ყოფილი თავმჯდომარის მიერ გაკეთებულ განცხადებას, რომ საპარლამენტო არჩევნები შესაძლოა 2020 წლის დეკემბერში ჩატარდეს და ეს პრობლემას არ წარმოადგენს, არასამთავრობო სექტორი კრიტიკულად აფასებს.

მათი თქმით, ეს სარისკო გადაწყვეტილებაა, რადგან არჩევნების დეკემბერში ჩატარების შემთხვევაში, მეათე მოწვევის პარლამენტის უფლებამოსილების ცნობა 2020 წელს ვეღარ მოესწრება, რაც იმას ნიშნავს, რომ ირღვევა საკანონმდებლო ორგანოს მუშაობის კონსტიტუციური ვადები და მომდევნო არჩევნები 2024 წლის ნაცვლად, 2025 წლამდე გადაიწევს.

არასამთავრობო სექტორის წარმომადგენლებმა ასევე ყურადღება გაამახვილეს არჩევნების გადაწევის აუცილებლობაზე და იმ პოლიტიკურ შედეგებზე, რაც "ქართულ ოცნებას" შესაძლოა ხელს აძლევდეს და შესაძლოა მმართველი პარტია პანდემიას პოლიტიკური მიზნების განხორციელების მიზნით იყენებდეს.

"ეს არ არის შემთხვევითი განცხადებები, ერთგვარად ფონის მოსინჯვაა საზოგადოებაში, რომ თუკი ამის საჭიროება დადგება ერთის მხრივ ობიექტურად ან მეორეს მხრივ თუ ქართული ოცნება ჩათვლის, რომ მას სჭირდება არჩევნების გადავადება, საზოგადოების რეაქცია და დამოკიდებულება როგორი იქნება. მთავარი გამოწვევა აქ არის ის, ამ გადაწყვეტილების მიღებისას რითი იხელმძღვანელებს მმართველი პარტია. კომპლექსში თუ შევხედავთ ამას, ბუნებრივია მმართველი პარტიისათვის არჩევნების გადადება არ უნდა იყოს მომგებიანი" - განაცხადა საქართველოს ახალგაზრდა იურისტთა ასოციაციის თავმჯდომარემ სულხან სალაძემ