„სოფრომაძის განცხადება ასეთ პირობებში, გმირობის ტოლფასია“ - ასე აფასებს „ფრესკო“ ხელმძღვანელის განცხადებას საპარლამენტო ფრაქცია „ერტიანი ნაციონალური მოძრაობის“ თავმჯდომარე რომან გოცირიძე.

როგორც გოცირიძე ნიუპოსტთან საუბრისას აღნიშნავს, დღეს საქართველოში ბიზნესი დარეკეტებული და შეშინებულია. ამის მაგალითად კი კოვიდ ფონდში, გაჭირვებული ადამიანების დასახმარებლად გადარიცხული ის 133 მილიონი მოჰყავს, რომელიც ჯერ კიდევ გაყინულია და საიდანაც მოსახლეობას დახმარების სახით არც ერთი თეთრი არ მიუღია.

„ბიზნესი არათანაბარ მდგომარეობაში იმყოფება, ფაქტობრივად კონკურენცია მკვდარია. იშვითაია ადამიანები, რომლებიც ვასილ სოფრომაძის მსგავსად ბედავენ და სიმართლეს ამბობენ, საკუთარი ბიზნესრისკების ფასად. განსხვავებულ მდგომარეობაშია ხელისუფლებასთან დაახლოებულ ბიზნესი. მათ აქვთ ყველა გზა ხსნილი, მათ შორის გადასახადების ჩამოწერა, საშეღავათო პირობები და ა.შ.

ხელისუფლება ავიწროვებს ბიზნესს და ფაქტობრივად ქვეყანაში არ არსებობს ბიზნესის თავისუფალი პირობები. სასამართლოში სამართალს ვერ იპოვი და ასეთ პირობებში წარმოუდგენელია ინვესტორის შემოსვლა“ - ამბობს გოცირიძე და დასძენს, რომ ახლა პარლამენტი ანტიდემპინგური კანონის მიღებას აპირებს, რომელიც მართალია ნორმალურ ქვეყანაში ბიზნესის განვითარებას უწყობს ხელს, მაგრამ საქართველოში ივანიშვილთან დაახლოებული ბიზნესის პრივილეგირებულ მდგომარეობაში ჩასაყენებლად იქნება გამოყენებული.