„ნიუპოსტის“ ექსკლუზიური ინფორმაციით, ზუგდიდში, პრეზიდენტის რეზიდენციასთან ნაპოვნი დაჭრილი პოლიციელი ორი დღის წინ იმავე ადგილზე თავისივე მეჯვარის საცოლის გაუპატიურებას ცდილობდა.

პატრულ-ინსპექტორი, რომელიც ახლა მძიმე მდგომარეობაში ზუგდიდის კლინიკაში იმყოფება და ქუთაისში ან თბილისში გადასაყვანად ამზადებენ, შესაძლოა, უახლოეს დღეებში, ჯანმრთელობის მდგომარეობის გაუმჯობესებისთანავე სწორედ გაუპატიურების მცდელობისთვის დაიკითხოს ან მოხდეს მისი დაკავებაც კი.

მეჯვარის საცოლესთან დაკავშირებული ინციდენტი ორი დღის წინ მოხდა. ადგილს, სადაც დაჭრილი პოლიციელი იპოვეს, გვერდიდან პრეზიდენტის რეზიდენცია, უკანა მხრიდან კი ზუგდიდის ბოტანიკური ბაღი ესაზღვრება.

ინციდენტის დეტალებს, რომელიც ექსკლუზიურად შეგვატყობინეს, „ნიუპოსტი“ დეტალურად არ აღწერს - შემთხვევა იმით დასრულდა, რომ პოლიციელის მხრიდან სექსუალური ძალადობის გამოვლენის შემდეგ ძალადობის ობიექტი გოგონა შემთხვევის ადგილიდან კივილით გაიქცა.

პატრულ-ინსპექტორი თავისივე მეჯვარემ სასტიკად სცემა. სავარაუდოდ, სწორედ ამ ინციდენტის დროს დაუსერეს გოგა ანჩაბაძეს სხეული, მოტეხეს კიდური და მოაჭრეს ყური.

ამ ვერსიის გადამოწმების მიზნით „ნიუპოსტი“ ნინო გიორგობიანს დაუკავშირდა, რომელმაც განაცხადა:

„გიდასტურებთ, რომ შემთხვევის მიზეზი პირადი უთანხმოებაა. გამოძიებით უკვე დადგენილია, რომ პატრულ-ინსპექტორს დაზიანებები თავისივე მეჯვარემ მიაყენა. რაც შეეხება თქვენს მიერ აღწერილ ვერსიას, ჩემთვის ჯერ არ არის ცნობილი დეტალები, თუმცა, არსებობს დაზარალებული და წინასაგამოძიებო მოქმედებები გაუპატიურების მცდელობასთან დაკავშირებით უკვე დაწყებულია“, - უთხრა „ნიუპოსტს“ შსს-ს საზოგადოებასთან ურთიერთობის სამსახურის უფროსმა.

„ნიუპოსტის“ ინფორმაციით, პოლიციელის დაჭრის შემდეგ დაზარალებულმა, საქმროს მდგომარეობის შემსუბუქების მიზნით, განცხადება მართლაც დაწერა და პატრულ-პოლიციელის მიმართ საქმე გაუპატიურების მცდელობისთვის აღიძვრება. 

პარალელურად, პოლიციელზე ძალდობის გამო სისხლის სამართლის საქმე აღიძვრება დაჭრილი პოლიციელის მეჯვარის მიმართაც, რომლის ვინაობა ამ დროისთვის არ სახელდება. ამ დრომდე უცნობია ასევე მისი ადგილსამყოფელიც.

ასევე „ნიუპოსტის“ ინფორმაციით, დაჭრილი პოლიციელის მეჯვარემ, შურისძიების შემდეგ, შეგნებულად შეარჩია ის ადგილი, სადაც მის საცოლეზე ძალადობა მოხდა, გოგა ანჩაბაძემ კი ყოფილი კოლეჯის შენობამდე, სადაც დევნილები არიან ჩასახლებული, დამოუკიდებლად მიაღწია და ადგილობრივებს დახმარება სთხოვა, რის შემდეგაც შემთხვევის ადგილზე პოლიცია და სასწრაფო მივიდა.

შენიშვნა: სქრინ-ფოტო "ლაივპრესის" ვიდეომასალიდან