აშშ-ის ელჩი კელი დეგნანი საქართველოს წითელი ჯვრის საზოგადოების გორის ფილიალს ეწვევა

პოლიტიკა - 16:32, 10 Jun, 2020

459

ხვალ, 11 ივნისს, 14:00 საათზე ამერიკის შეერთებული შტატების ელჩი კელი დეგნანი ეწვევა საქართველოს წითელი ჯვრის საზოგადოების გორის ფილიალს (ბარნოვის 9 ა) და შეხვდება საქართველოს წითელი ჯვრის საზოგადოების პრეზიდენტს, ნათია ლოლაძეს და წითელი ჯვრისა და წითელი ნახევარმთვარის საზოგადოებათა საერთაშორისო ფედერაციის ოფისის ხელმძღვანელს სამხრეთ კავკასიაში, ოლგა ჯუმაევას. ისინი შეხვდებიან საქართველოს წითელი ჯვრის მოხალისეებს და განიხილავენ გორის ფილიალის COVID-19-ზე რეაგირების საქმიანობას. ისინი ასევე ეწვევიან გორში მცხოვრებ ბენეფიციარებს და სასურსათო და ჰიგიენურ ამანათებს გადასცემენ. USAID–ის ფინანსური მხარდაჭერით, საქართველოს წითელი ჯვრის საზოგადოებას შესაძლებლობა აქვს დაეხმაროს ადგილობრივ თემებს COVID-19 პანდემიის პირობებში.

ვიზიტის ფარგლებში, ელჩი დეგნანი შეხვდება გორის მერს, კონსტანტინე თავზარაშვილს და შიდა ქართლის გუბერნატორს, გიორგი ხოჯევანიშვილს, რათა განიხილოს შემდეგი საკითხები: Covid-19 პანდემიის გავლენა ქალაქსა და რეგიონზე, მოახლოებული არჩევნების სამზადისი და ადმინისტრაციულ გამყოფ ხაზთან მიმდინარე უკანონო ბორდერიზაციის ქმედებების ზეგავლენა ადგილობრივ მოსახლეობაზე. ელჩი დეგნანი ჩაერთვება დისკუსიაში USAID-ის პროგრამა PITA-ს მონაწილე ახალგაზრდებთან, რათა უკეთ გაეცნოს მათ მოსაზრებებს და ხაზი გაუსვას ქართველი ახალგაზრდების ჩართულობის მნიშვნელობას. ვიზიტის დასასრულს ელჩი მოინახულებს გორის ციხეს და გაეცნობა გეგმებს, რომელიც USAID-ის დახმარებით გორის ციხის ისტორიის ცოცხალ ძეგლად გადაქცევას ითვალისწინებს.