"კურსელები, მეგობრები, გაურკვეველი დაჯგუფება..."- როგორ ქმნის ივანიშვილი საარჩევნო სიას

პოლიტიკა - 16:03, 10 Jun, 2020

965

"ქართული ოცნების" სია და სიის პირველი ნომერი - საკითხი დღეს პოლიტიკური განხილვის თემაა. პრემიერმა გახარიამ უპასუხოდ დატოვა კითხვა, იქნება თუ არა ის სიის სათავეში.

ოპოზიციონერი დეპუტატი ეკა ბესელია კი იხსენებს, რომ საარჩევნო სიებთან დაკავშირებით „ქართულ ოცნებაში“ 2016 წლის არჩევნებზე საკმაოდ ცუდი პროცესები წარიმართა.

"იქნება თუ არა გახარია საარჩევნო სიაში, რთული სათქმელია, თუ ლოგიკას მივყვებით - არა“, - ამბობს დეპუტატი.

"ცოტა რთულია პროგნოზირება, იმიტომ, რომ ლოგიკას არ მიყვება ხოლმე ქართული ოცნების პოლიტიკა, როდესაც საარჩევნო სიის შედგენა ხდება. ხედვა, როგორი უნდა ყოფილიყო საარჩევნო სია, ეს იყო დამყარებული იმაზე, ვის მეტი გავლენა ჰქონდა, რომ შემოეყვანა თავისი ახლობლები, კურსელები, მეგობრები და ა.შ. ამ კურსელებმა და მეგობრებმა ჩამოაყალიბეს გაურკვეველი დაჯგუფება, რომელიც მე ვფიქრობ, ძალიან დამაზიანებელი იყო პარლამენტისთვის.

იქნება თუ არა გახარია საარჩევნო სიაში, რთული სათქმელია, თუ ლოგიკას მივყვებით - არა. ბახტაძესაც არ ვფიქრობ, იმიტომ, რომ არ მგონია. რთული წარმოსადგენია, ვინ უნდა ჩაუდგეს ამ სიას სათავეში", - განაცხადა ეკა ბესელიამ.