ახალგაზრდულმა პარლამენტმა საქართველოს პარლამენტს საკანონმდებლო წინადადებების პაკეტით მიმართა.  პაკეტი მოიცავს ხუთი კომიტეტის ექვს ინიციატივას შემდეგ თემებზე: საკანონმდებლო წინადადება საქველმოქმედო ორგანიზაციაზე გაცემული შემოწირულების გამოქვითვის შესახებ; სააქციო საზოგადოებაში აქციათა სავალდებულო მიყიდვის წესის შესახებ; ეკონომიკური საქმიანობისათვის გამოყენებულ ძირითად საშუალებათა საამორტიზაციო ანარიცხების გამოქვითვის უფლების შესახებ; საქველმოქმედო და ახალგაზრდულ ორგანიზაციებზე გაცემული თანხის გამოქვითვის შესახებ; ზოგადი განათლების დაწყებით საფეხურზე სწავლის დაწყების ასაკის შესახებ; სამხედრო ვალდებულებებისა და სამხედრო სამსახურის შესახებ საქართველოს კანონში ცვლილებების შეტანის თაობაზე; ინიციატივების პაკეტის წარდგენის შემდეგ საქართველოს ახალგაზრდული პარლამენტი მთელი კვირის განმავლობაში თითოეულ ინიციატივასთან დაკავშირებით ბრიფინგებს გამართავს. აღსანიშნავია, რომ საქართველოს ახალგაზრდული პარლამენტის ორი საკანონმდებლო ინიციატივა, რომელიც ზაფხულში იქნა ინიცირებული საქართველოს პარლამენტში, უკვე განიხილება.