რამდენიმე დღეში აჭარის მთავრობასა და ლიბერთი ბანკს შორის ხელი მოეწერება ხელშეკრულებას, რომლის შესაბამისადაც ლიბერთი ბანკი მოახდენს ქობულეთელი მსესხებლების პრობლემური სესხის რეფინანსირებას. ბანკი მსესხებლის სრული საკრედიტო/სასესხო დავალიანების რეფინანსირებას  განახორციელებს, რის შედეგადაც  ბანკი მსესხებელთან შვიდი წლით კრედიტის ხელშეკრულებას გააფორმებს, წლიური განაკვეთით 15% (თხუთმეტი პროცენტი) ლარში, რომლის უზრუნველსაყოფადაც იპოთეკით დაიტვირთება  მსესხებლის  უკვე არსებული/დატვირთული უძრავი ქონება. 

     აჭარის მთავრობა განახორციელებს ბანკის მიერ გაცემული კრედიტის მიზნობრივ თანადაფინანსებას და სამი წლის განმავლობაში დაფარავს კრედიტზე დადგენილი წლიური საპროცენტო განაკვეთიდან  12%, ხოლო დანარჩენ 3%-ს დაფარავს მსესხებელი. სამი წლის ვადის ამოწურვის შემდეგ საპროცენტო განაკვეთს სრულად გადაიხდის მსესხებელი იმ დროისათვის არსებული და ბანკის მიერ შეთავაზებული საპროცენტო განაკვეთის შესაბამისად. აჭარის მთავრობა კომისიის მიერ შესწავლილი კერძო ჰიპოთეკარებთან დავალიანების მქონე ოჯახების სიას გადასცემს ბანკს, რომელთაგანაც ბანკი შეარჩევს იმ მსესხებლებს, რომლებისთვისას შესაძლებელი იქნება რეფინანსირების შეთავაზება.

შეგახსენებთ, რომ აჭარის მთავრობის მიერ საგანგებოდ შექმნილმა კომისიამ  შეისწავლა ქობულეთში მცხოვრები 2008 წლის ომის შედაგად დაზარალებული ოჯახები. კომისიამ შეარჩია კერძო იპოთეკარებთან დავალიანების მქონე ოჯახები, რომელთაც აჭარის მთავრობა გაუწევს დახმარებას.