მაჟორიტარობის საერთო კანდიდატები - გაერთიანებული ოპოზიცია მორიგი კონსულტაციებისთვის ემზადება

პოლიტიკა - 10:26, 08 Jun, 2020

476

ხელისუფლების ოპონენტები კონსულტაციისთვის ემზადებიან. ოპოზიცია მაჟორიტარობის კანდიდატებზე შესათანხმებლად "ლეიბორისტული პარტიის" ოფისში მომავალ კვირაში შეიკრიბება.

კონკრეტულ სახელებსა და გვარებზე გაერთიანებულ ოპოზიციაში ჯერჯერობით არ საუბრობენ და ამბობენ, რომ ბიძინა ივანიშვილის ხელისუფლების დასამარცხებლად ერთიანობა მნიშვნელოვანია. მათივე შეფასებით, ამ ერთიანობისთვის წინ გადადგმული ნაბიჯია "ენმ"-ს ინიციატივა, რომლითავ ყველაზე დიდი ოპოზიციური პარტია თბილისის ექვს ოლქს დანარჩენ ოპოზიციას უთმობს და მაჟორიტარობის საკუთარი კანდიდატი მათ მხოლოდ ორ ოლქში ეყოლებათ.ენმ-ს წევრი, გიორგი ბარამიძე იმედს გამოთქვამს, რომ დარჩენილი ექვსი ადგილიდან ნაწილი მაინც ერგება იმ პარტიებს, რომლებიც ახლო წარსულში ან "ქართულ ოცნებასთან" იყვნენ აფილირებული, ან პირდაპირ ოცნების მხარდამჭერები იყვნენ."იმედი გვაქვს, რომ პარტიები, რომლებიც შეიკრიბებიან, კონსტრუქციულად იმსჯელებენ და პასუხისმგებლობის განცდით ჩვენი საზოგადოების წინაშე და სწორედ დიდი გამარჯვების მიზნით და არა ცალკეული პარტიების, ასე ვთქვათ, უკეთესი რეზულტატის ჩვენების მიზნით მივიღებთ გადაწყვეტილებას და ისინი შეძლებენ ამ გადაწყვეტილების მიღებას, რომ ადეკვატურად გადაანაწილონ ეს ექვსი ადგილი, მაქსიმალურ რაოდენობა პარტიებზე", - ამბობს ნაციონალური მოძრაობის პოლიტსაბჭოს წევრი გიორგი ბარამიძე. "ლეიბორისტული პარტიის" ლიდერი, შალვა ნათელაშვილი ს განცხადებით, თუ გადაწყდება მრავალპარტიულ ფორმატში და ოპოზიციაში ჩათვლიან, რომ მისი ყოფნა მაჟორიტარულ თბილისის ოლქებში საერთო გამარჯვებისთვის არის საჭირო და აუცილებელი, იგი მზად არის იყოს კანდიდატი.

"შეიძლება ჰქონდეს კონკრეტულ კანდიდატს კონკრეტულ ოლქში მეტი ხმები ან მან შეძლოს ფინანსური თუ სხვა რესურსებით მეტი ხმების მოგროვება, მაგრამ მისი პერსონა იყოს წამგებიანი მთელი ოპოზიციისთვის. თუ გადაწყდება მრავალპარტიულ ფორმატში და ჩათვლიან, რომ ჩემი ყოფნა მაჟორიტარულ თბილისის ოლქებში საერთო გამარჯვებისთვის არის საჭირო და აუცილებელი, მე, რა თქმა უნდა, დავდგები", - აცხადებს "ლეიბორისტული პარტიის" ლიდერი შალვა ნათელაშვილი.