ბუნტი ცხინვალის ციხეში - ადმინისტრაციასთან დაპირისპირების შემდეგ პატიმრებმა ვენები გადაიჭრეს

შემთხვევა - 17:33, 05 Jun, 2020

1181

4 ივნისს, ცხინვალის კოლონიაში, ადმინისტრაციის მიერ პატიმრებისთვის მობილური ტელეფონებისა და სხვა აკრძალული ნივთების ამოღების მიზნით ჩატარებული ჩხრეკის დროს კონფლიქტი მოხდა ადმინისტრაციის წარმომადგენელთა და პატიმრებს შორის.

"მობილური ტელეფონის ამოღების მცდელობის დროს ერთერთმა პატიმარმა ციხის თანამშრომელს წინააღმდეგობა გაუწია ფიზიკური ძალის გამოყენების მეშვეობით, რასაც თან სდევდა გინება და სიტყვიერი შეურაცხყოფა," - ნათქვამია საოკუპაციო რეჟიმის ე.წ. იუსტიიის სამინისტროს განცხადებაში.

წესრიგის აღდგენის მიზნით ციხეში პოლიციის გაძლიერებული რაზმი შევიდა.

ინციდენტის მეორე დღეს, 5 ივნისს, გავრცელებული ინფორმაციით, პატიმრებმა უარი განაცხადეს ადმინისტრაციას დამორჩილებოდნენ, წინააღმდეგობა გაუწიეს მას და არ შეასრულეს მათი ბრძანებები, ხოლო რამდენიმე პატიმარმა ვენები გადაიჭრა, რის გამოც ისინი საავადმყოფოში გადაიყვანეს.

საოკუპაციო რეჟიმის ინფორმციით, ციხეში ადმინისტრაციის წარმომადგენელთა უსაფრთხოებას პოლიციის გაძლიერებული რაზმები იცავენ.

პატიმრების ოჯახის წევრებს საოკუპაციო რეჟიმის ლიდერი ანატოლი ბიბილოვი შეხვდა. მან განაცხადა, რომ პატიმრებს ვენები არ გადაუჭრიათ, "კანი დაისერეს" და ყველა დამნაშავე აუცილებლად დაისჯება.