ჩინელი გზის მშენებლები უძველეს ქართულ ძეგლს განადგურების საფრთხეს უქმნიან

პოლიტიკა - 18:11, 05 Jun, 2020

3102

ჩინური კომპანიის მიერ წამოწყებული მშენებლობა მე-13 საუკუნის ისტორიულ ძეგლს გაქრობის საფრთხის წინაშე აყენებს.

იმისთვის, რომ ქვეშეთი-კობის 23 კილომეტრიანი მაგისტრალი აშენდეს, სოფელ ნაღვარევში, ადგილობრივი მცხოვრების ორ სართულიანი სახლი ჩინური კომპანიის მშენებლებმა უკვე დაანგრიეს. ამ ტერიტორიაზე მუშებისთვის 50 ბინიანი ნაგებობა უნდა განთავსდეს. ადგილობრივების თქმით, კორპუსის მშენებლობის პროცესი დაჩქარებულ ტემპში მიმდინარეობს. ამის გამო კი ეკლესია, რომელსაც კულტურული მემკვიდრეობის სტატუსი აქვს, განადგურების საფრთხის წინაშე დგას. ჩინური კომპანია „ჩინეთის რკინიგზის 23–ე ბიუროს ჯგუფი“ წარმომადგენელმა აქციაზე მისულ მოსახლეობასთან აღიარა, რომ მშენებლობა ნებართვის გარეშეა დაწყებული. ადგილობრივები უკანონობის შეჩერებას კატეგორიულად ითხოვენ. ამის მთავარი მიზეზი მე-13 საუკუნეში აგებული ტაძარია, რომელიც მშენებლობიდან მხოლოდ 30 მეტრით არის დაშორებული.

ხადას ხეობის მცხოვრებლები საპროტესტო აქციებს მშენებლობის შეჩერების და ჩინური კომპანიის წინააღმდეგ უკვე წლებია ატარებენ. თუმცა ამის მიუხედავად, სახელმწიფო ქვეშეთი კობის მონაკვეთზე ასფალტ ბეტონის გზას 6 ხიდით და 5 გვირაბით მაინც აშენებს. მათ შორის ერთი 9 კილომეტრიანი გვირაბი ჯვრის უღელტეხილზე გაივლის.

,, გვირაბის აშენებისას სავარაუდოდ დაიწყება ბურღვითი სამუშაოები, რაც ძლიერ ვიბრაციას გამოიწვევს. შედეგად კი უძველესი შენობები საბოლოოდ განადგურდება. რისკის ქვეშ დგას ხეობის სავიზიტო ბარათად ცნობილი ის 60 კოშკიც, რომლებთანაც მაგისტრალი 100 მეტრის სიახლოვეს გაივლის. საფრთხე ჩვენს საცხოვრებელ სახლებსაც ემუქრება’’ - ამბობს საპროტესტო აქციის მონაწილე ზურაბ ბურდული.

მუნიციპალიტეტის მერი კი მედიასთან განმარტავს, რომ უკაკნონო მშენებლობის შესახებ ინფორმაცია საერთოდ არ აქვს.