საპარლამენტო უმცირესობის წევრი გიორგი კანდელაკი, მომავალი პრეზიდენტის გიორგი მარგველაშვილის რუსეთის "პირველი არხის" გადაცემა "Воскресное Время"-სთვის მიცემულ ინტერვიუს გამოეხმაურა:

„ კიდევ ერთხელ ვუყურე ახლადარჩეული პრეზიდენტის სამარცხვინო ინტერვიუს „ვრემიაში“. ბატონო გიორგი, ბარემ პირდაპირ ბოდიში მოუხადეთ რუსეთს, პირველ რიგში კი – „უნეტარეს“ პატრიარქ კირილს არა მხოლოდ იმაზე, რომ თავი დავიცავით 2008 წელს, არამედ ვარდების რევოლუციაზეც, რომელსაც თქვენ ბოლომდე ეწინააღმდეგებოდით, რის გამოც გაგაგდოთ ზურაბ ჟვანიამ; იმაზე, რომ 1992 წელსვე არ მივეცით აფხაზეთიდან ჩვენი ხალხის გამოყრის საშუალება;

არ დაგავიწყდეთ, რამდენიმე ათასი მშვიდობიანი მოქალაქის მკვლელობა „გაუგებრობად“ მონათლოთ; იმაზე, რომ 1989 წელს თავისუფლება მოვითხოვეთ და „პერესტროიკას“ ვუღალატეთ; იმაზეც, რომ 1991 წელს ლიტვის შემდეგ პირველებმა გამოვაცხადეთ დამოუკიდებლობა;

რა თქმა უნდა, არ დაგავიწყდეთ სინანულით აღსავსე ჭმუნვა 1924 წლის ბრიყვულ ანტიბოლშევიკურ აჯანყებაზე და იმაზე, რომ მანამდე კიდევ რამდენჯერმე ვეომეთ საბჭოთა რუსეთს ვითომ ჩვენი თავისუფლებისთვის, სინამდვილეში კი ავმჩატდით და „სულიერი ერთობის“ დასანგრევად შეთქმული ბინძური პოლიტიკოსების ანკესზე წამოვეგეთ“ – წერს "ფეისბუქში" გიორგი კანდელაკი.