ხელისუფლების ფავორიტი კომპანია, რომლის სამეთვალყურეო საბჭოშიც "ოცნების" ყოფილი მაღალჩინოსნები არიან თავმოყრილნი შეღავათებით სარგებლობს - აუდიტის დასკვნის თანახმად, კომპანია ენერგოტრნსს სახელმწიფო სესხით სარგებლობისთვის რამდენიმე მილიონი უნდა გადაეხადა, მაგრამ მთავრობის გადაწყვეტილებით სესხის მომსახურება 2027 წლამდე გადაუვადეს.

ქართული ოცნების ყოფილი მაღალჩინოსნებიდან, რომლებიც ამ კომპანიის სამეთვალყურეო საბჭოს შემადგენლობაში არიან, კითხვებზე მხოლოდ ვანო ზარდიაშვილი პასუხობს და აცხადებს, რომ ახალი მისულია კომპანია "ენერგოტრანსში" და შესაბამისად, ამ სესხების შესახებ ინფორმაციას არ ფლობს.

აუდიტის სამსახურის დასკვნაში აღნიშნულია, რომ ყოფილი მაღალჩინოსნების გამო შეიძლება უვადებდეს ამ კომპანიას სესხების გადახდის ვადას. ოპოზიციის წარმომადგენლები პირდაპირ კორუფციის ნიშნებს ხედავენ.

ერთიანი ნაციონალური მოძრაობის წევრი, მურთაზ ზოდელავა აცხადებს, რომ ეს არის აღვირახსნილი კორუფცია.

"ძალიან ბევრ ადამიანს, რომელსაც აქვს გამოტანილი კრედიტი და რომელმაც დაკარგა ყოველნაირი შემოსავალი და აი ამ დღეებში დაურეკავს უამრავი საბანკო ოფიცერი, უამრავი სპეციალური უწყება, რომელიც არის ფულის ამოღებით დაკავებული და მოთხოვენ ფულის გადახდას, და ამ პროცესის პარალელურად ჩვენ ვხედავთ კომპანიას, რომელშიც არიან მინისტრები, დეპუტატები, ქართული ოცნების ელიტა და რომელიც ყოველგვარი პრობლემის გარეშე ახერხებს, რომ რამდენიმე მილიონიანი სესხი 7 წლით გადაავადოს", - ამბობს ერთიანი ნაციონალური მოძრაობის პოლიტსაბჭოს წევრი მურთაზ ზოდელავა.