"ოპოზიციიდან ერთი პარტია 12 %-იანი, მეორე კი 3 %-იანია, ასეთ ვითარებაში, მათთვის აზრი დაკარგა არჩევნებმა და გიორგი რურუას საკითხი მხოლოდ საბაბია"- კობახიძე

პოლიტიკა - 15:42, 01 Jun, 2020

552

"ქართული ოცნების" ერთ-ერთი ლიდერი ირაკლი კობახიძე ამბობს, რომ ოპოზიციური პარტიებიდან ერთი 12%-იანია, დანარჩენები კი 3%-იანები და ამიტომ მათთვის არჩევნებში მონაწილეობა აზრს კარგავს.

ირაკლი კობახიძემ ამ რეპლიკით ოპოზიციას უპასუხა, რომლებიც 8 მარტის შეთანხმების შესრულებას და "მთავარი არხის" ერთ-ერთი მეწილის გიორგი რურუას გათავისუფლებასმოითხოვენ, წინააღმდეგ შემთხვევაში ხელისუფლების ოპონენტები საკონსტიტუციო ცვლილებებსმხარს არ დაუჭერენ.

კობახიძე ამბობს, რომ ოპოზიციის მოტივი აბსოლუტურად ცხადი და ნათელია.

"რაც შეეხება იმას, თუ ვის აწყობს ეს ცვლილებები, მათემატიკურად აწყობს, ბუნებრივია, ოპოზიციას იქიდან გამომდინარე, რომ ამ ცვლილებების საფუძველზე ისინი მიიღებენ მეტ მანდატს პარლამენტში, ვიდრე მიიღებდნენ 77/73-ის პირობებში, თუმცა, რეალობაა ასევე ისიც, რომ ისინი ხედავენ, არჩევნებს მათთვის აზრი აქვს დაკარგული. ყველა შემთხვევაში ეს იქნება 77/73-ზე, თუ 120/30-ზე, ისინი მარცხისთვის არიან განწირული ამ არჩევნებში. შესაბამისად, ისინი, სამწუხაროდ, გადართულნი არიან დესტრუქციაზე. როგორც ვიცი, არ აპირებენ საორგანიზაციო კომისიის მუშაობაში მონაწილეობას. გიორგი რურუა არის საბაბი, მიზეზი არის ის, რომ ისინი არჩევნებში აზრს ვერ ხედავენ, იქიდან გამომდინარე, რომ ერთი არის 12%-იანი პარტია, მეორე არის 3%-იანი პოლიტიკური პარტია. ასეთ პირობებში მათთვის აზრი დაკარგა არჩევნებმა", - განაცხადა ირაკლი კობახიძემ.