პანიკის საფუძველი არ გვაქვს, ქვეყანაში პროცესები მართვადია, ეპიდემიოლოგიური სიტუაცია სრულ კონტროლს ექვემდებარება

პანიკის საფუძველი არ გვაქვს, ქვეყანაში პროცესები მართვადია, ეპიდემიოლოგიური სიტუაცია სრულ კონტროლს ექვემდებარება - ამირან გამყრელიძე

COVID-19 - 14:07, 31 May, 2020

695

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის თქმით, შეზღუდვების შემსუბუქება ინფიცირებულთა რაოდენობის ზრდას გამოიწვევს, თუმცა პროცესები მართვადია და პანიკის საფუძველი არ გვაქვს.
გამყრელიძემ ასევე აღნიშნა, რომ 26 ახალი შემთხვევიდან ყველას კონტაქტი ცნობილია და ეპიდემიოლოგიური სიტუაცია სრულ კონტროლს ექვემდებარება.
„ზოგადად, შემსუბუქების პროცესის მიმდინარეობისას ყველა ქვეყანაში დაფიქსირდა შემთხვევათა რაოდენობის მატება. ალბათ, მოსალოდნელია, რომ ჩვენთანაც იყოს, მაგრამ ეს არავითარი პანიკის საფუძველი არ უნდა გახდეს. თუნდაც დღეს, ახალი შემთხვევების 26 რიცხვით მომატება პანიკის არავითარ საფუძველს არ წარმოადგენს, რადგან ყველა ეს შემთხვევა კონტროლქვეშაა. ვიცით, თითოეული კონტაქტი, ვახდენთ თითოეულის სწრაფ იზოლირებას, მკურნალობას და მათი კონტაქტების სწრაფ გამოკვლევას. რა თქმა უნდა, შემსუბუქების პროცესის დროს მოსალოდნელია, იყოს ახალი შემთხვევების მატება, მაგრამ ეს პანიკის საფუძველი არ არის, რადგან ქვეყანაში პროცესები მართვადია და ეპიდემიოლოგიური სიტუაცია სრულ კონტროლს ექვემდებარება. ჩვენ სულ უფრო და უფრო ახალი ჯგუფების ტესტირებას ვაპირებთ, რათა მაქსიმალურად მოვახდინოთ პრევენცია და დროული იდენტიფიცირება, თუ კორონავირუსზე დადებითი შემთხვევა არის“,-განაცხადა გამყრელიძემ.