სავარაუდოდ, გადაწყვეტილება მომდევნო დღეებში გამოცხადდება, დღეს კი მხარეები დასკვნით სიტყვებს წარმოთქვამენ. ბაჩო ახალაიას ერთ-ერთმა ადვოკატმა დავით დეკანოიძემ განაცხადა, რომ თბილისის სააპელაციო სასამართლოში ბაჩო ახალაიას საქმეზე დასკვნითი პროცესი 14:00 საათზე გაიმართება.

შეგახსენებთ, რომ პროკურატურამ ახალაიას მიმართ სამხედროების წამების საქმეზე საქალაქო სასამართლოს გამამართლებელი განაჩენი გაასაჩივრა. პროკურატურის საჩივრის განხილვა მეორე ინსტანციის სასამართლომ 1 ნოემბერს დაიწყო. დაცვის მხარე მიიჩნევს, რომ პროკურატურის საჩივარი დაუსაბუთებელია და ძირითადად პირველი ინსტანციის სასამართლოს მოსამართლის კრიტიკას ეხება ახალაიასა და მასთან ერთად ბრალდებულებისთვის გამამართლებელი განაჩენის გამოტანის გამო.

ახალაიას ადვოკატები დარწმუნებული არიან, რომ სააპელაციო სასამართლო ძალაში დატოვებს საქალაქოს გადაწყვეტილებას გამამართლებელ განაჩენთან დაკავშირებით.  სამხედროების მიმართ არაადამიანური მოპყრობისა და ზვიად აბესაძისთვის თავისუფლების უკანონო აღკვეთის საქმეზე საქართველოს თავდაცვის ყოფილ მინისტრ ბაჩო ახალაიასა და მასთან ერთად ბრალდებულების გამამართლებელი განაჩენი საქალაქო სასამართლოს მოსამართლემ პირველ აგვისტოს გამოაცხადა.