რუსული მცოცავი ოკუპაცია - ოკუპანტები პერევის მიმართულებით მიწების მისატაცებლად ემზადებიან

პოლიტიკა - 12:14, 30 May, 2020

678

ე.წ. საოკუპაციო საზღვართან, ჩორჩანა-პერევის მონაკვეთზე, ოკუპანტები, ასობით ჰექტრის მიწის მისატაცებლად ემზადებიან.

"ნიუპოსტისთვის" მიწოდებული ინფორმაციიდან და ფოტოდანაც ჩანს, რომ საოკუპაციო ძალების წარმომადგენლები ახალ ტერიტორიას მავთულხლართების გასაბმელად ამზადებენ. ამასთან, ტყეში ოკუპანტებს სპეციალური ხაფანგებიც აქვთ დაგებული.

მონიშვნები ჩორჩანადან უკვე პერევის მიმართულებით გადადის.

სახელმწიფო უსაფრთხოების სამსახურში კი აცხადებენ, რომ „პროვოკაციული ქმედების თითოეულ ფაქტზე რეაგირება ხორციელდება“.

“ხაშურის მუნიციპალიტეტის სოფელ ჩორჩანას მიმდებარე ტყის მასივში, რუსეთის საოკუპაციო ძალები უკანონო ე.წ. ბორდერიზაციას 2019 წლიდან აწარმოებენ. ტყის მასივში აღმართულია უკანონო ინსტალაციები და გარკვეულ მონაკვეთებზე გაკეთებულია უკანონო მონიშვნები.

სოფელ ჩორჩანას მიმდებარედ მიმდინარე უკანონო ე.წ. ბორდერიზაცია წარმოადგენს ჟენევის დისკუსიებისა და ოკუპაციასთან დაკავშირებული სხვა ფორმატების მთავარ განსახილველ საკითხს. პროვოკაციული ქმედების თითოეულ ფაქტზე ხორციელდება რეაგირება ჩვენს ხელთ არსებული ყველა ბერკეტის ამოქმედებით. ამავდროულად, პროცესში აქტიურად არიან ჩართულები ევროკავშირის სადამკვირვებლო მისიის წარმომადგენლები, ჟენევის თანათავმჯდომარეები და ჩვენი სხვა საერთაშორისო პარტნიორები”, - აცხადებენ სუს-ში .