უარყოფითად ვაფასებთ, საფრთხეა სასამართლოების სანდოობისთვის

უარყოფითად ვაფასებთ, საფრთხეა სასამართლოების სანდოობისთვის - საია როინიშვილის დანიშვნაზე

პოლიტიკა - 20:52, 29 May, 2020

456

საქართველოს ახალგაზრდა იურისტთა ასოციაცია საკონსტიტუციო სასამართლოს წევრად ვასილ როინიშვილის დანიშვნის პროცედურას უარყოფითად აფასებს.
საიას თქმით, გადაწყვეტილება უზენაესი სასამართლოს პლენუმისა და საკონსტიტუციო სასამართლოს სანდოობისთვის საფრთხის შემცველია.
„2020 წლის 29 მაისს, უზენაესი სასამართლოს პლენუმმა, საკონსტიტუციო სასამართლოს წევრად ვასილ როინიშვილი დანიშნა (მომხრე - 18, წინააღმდეგი - 2, თავად კანდიდატს კენჭისყრაში მონაწილოება არ მიუღია). სხდომაზე 21 დამსწრე წევრიდან კანდიდატს სულ ოთხმა დაუსვა კითხვა, ერთმა წევრმა კი მხოლოდ თავისი მხარდამჭერი მოსაზრებები დააფიქსირა. საბოლოო ჯამში, არ გამართულა ჯეროვანი დისკუსია. სამწუხაროა, რომ უზენაესი სასამართლოს თავმჯდომარემ, არ გამოიყენა შესაძლებლობა დღევანდელ სხდომაზე არ აერჩიათ მოსამართლე, არამედ მხოლოდ კანდიდატი დასახელებულიყო. ამით საზოგადოებას მიეცემოდა შესაძლებლობა გამოეხატა საკუთარი დამოკიდებულება ბატონი ვასილ როინიშვილის მიმართ და მიეწოდებინა ის პლენუმის წევრებისთვის, რაც საბოლოოდ მათ უკეთ ინფორმირებულ გადაწყვეტილება უზრუნველყოფდა. ზემოაღნიშნულის გათვალისწინებით საია უარყოფითად აფასებს პლენუმის გადაწყვეტილებას და მას როგორც უზენაესი სასამართლოს პლენუმის, ისე საკონსტიტუციო სასამართლოს სანდოობისთვის საფრთხის შემცველად მიიჩნევს“, - აღნიშნულია ინფორმაციაში.