პანდემიასთან ბრძოლა და არცერთი სიტყვა ოკუპაციაზე - რაზე ისაუბრეს პირველმა პირებმა დამოუკიდებლობის დღეს

პოლიტიკა - 13:12, 26 May, 2020

562

საქართველოს დამოუკიდებლობის დღისადმი მიძღვნილი ღონისძიება და მთავრობის პირველი პირების მთავარი გზავნილები.
პრეზიდენტმა, პრემიერმა, პარლამენტის თავმჯდომარემ და თავდაცვის მინისტრმა ქვეყანას დამოუკიდებლობის დღე მიულოცეს, თუმცა არც ერთ მათგან არ გახსენებია მთავარი - ის , რომ რუსეთი ჩვენი ქვეყნის მტერია და ჩრდილოელი მეზობელი ისევ აგრძელებს საქართველოს ტერიტორიების ოკუპაციას.
ქვეყნის პირველმა პირებმა, დღეს მხოლოდ კორონავირუსზე გაამახვილეს ყურადღება და უხილავ მტერთან ბძოლაში ჯარისკაცების წვლილზე ისაუბრეს.

პრეზიდენტმაა მიმართვისას განაცხადა, რომ ომი გრძელდება - თუმცა იგი გულისხმობდა ომს COVID-19-თან, რომლის წინააღმდეგ ბრძოლაში აქტიური ჩართულობისთვის, სალომე ზურაბიშვილმა ჯარისკაცებს მადლობა გადაუხადა.

"დღეს უჩვეულო 26 მაისია, საზოგადოებას არ ეძლევა საშუალება თავდაცვის ძალებთან ერთად სრულფასოვანი მონაწილეობა მიიღოს დამოუკიდებლობის დღის აღნიშვნაში.

ჩვენი აქ მოსვლით და თავდაცვის ძალებთან დგომით გამოვხატავთ ამ დღის მნიშვნელობას საქართველოსთვის. ომი არ დასრულებულა და უხილავ მტერთან ბრძოლაში ყოფნას ვაგრძელებთ, - განაცხადა პრეზიდენტმა.

გლობალურ პანდემიაზე ისაუბრა საქართველოს პრემიერ-მინისტრმა, გიორგი გახარიამაც. მან პანდემიით გამოწვეული კრიზისის მართვაში ქართული ჯარის მიერ შეტანილ წვლილზე გაამახვილა ყურადღება.

“102 წლის წინ ეროვნულმა საბჭომ მიიღო დამოუკიდებლობის აქტი და ამ ნაბიჯით გადადგა უმნიშვნელოვანესი ნაბიჯი ქვეყნის შემდგომი განვითარებისთვის. საქართველოს ისტორიაში ესაა უაღრესად მნიშვნელოვანი დღე და მაშინ, სწორედ 26 მაისს, პირველმა რესპუბლიკამ განსაზღვრა ჩვენი ქვეყნის შემდგომი ორიენტაცია.

თითოეულ ქართველს, საქართველოს თითოეულ მოქალაქეს, საზღვარგარეთ მცხოვრებ საქართველოს თითოეულ თანამოქალაქეს, ჩვენს აფხაზ და ოს ძმებს, მინდა, მინდა მივულოცო 26 მაისი, უდიდესი რწმენით, რომ ჩვენ ერთად შევძლებთ ჩვენი ქვეყნის მშენებლობას, წარმატებული სახელმწიფოს შექმნას. მინდა, მივულოცო განსაკუთრებით თითოეულ ჯარისკაცს, რომელიც დღეს სამშვიდობო მისიებში ასახელებს ქვეყანას, რომელიც იცავს გლობალურ უსაფრთხოებას და ამით უდიდესი წვლილი შეაქვს თავსი სამშობლოს შემდგომ განვითარებასა და უსაფრთხოებაში. ასევე ჩვენ ყველას უნდა გვესმოდეს, რომ ჩვენ ვებრძვით პანდემიას. ყველას უნდა გვახსოვდეს ის წვლილი, რომელიც ქართულმა ჩვენმა ჯარმა შეიტანა პანდემიასთან ბრძოლაში. დღეს საქართველომ უნდა თქვას, რომ ყველამ ერღად სევძელით რისკის ლოკალიზება და მისი ეფექტური მართვა" - აღნიშნა პრემიერმა.

ოკუპაცია მხოლოდ პარლამენტის თავმჯდომარემ ახსენა და ამ გამოწვევის ფონზე პოზიტიურ დღის წესრიგზე ისაუბრა.

"102 წლის წინ, 22 მაისს, საქართველომ დამოუკიდებლობა გამოაცხადა და ნანატრი სახელმწიფოებრიობა მოიპოვა. სწორედ მაშინ, ჩვენმა წინაპრებმა საფუძველი ჩაუყარეს თანამედროვე სახელმწიფო ინსტიტუტებსა და დემოკრატიას. სამწუხაროდ, მალევე საბჭოთა ოკუპაციამ ქვეყნის განვითარება თითქმის 7 ათწლეულით შეაფერხა, მაგრამ მან ვერ შეაჩერა თავისუფლებისადმი ჩვენი სწრაფვა და მოძრაობა. 1991 წლის 9 აპრილს საქართველომ სახელმწიფოებრივი დამოუკიდებლობა აღადგინა და პირველი რესპუბლიკის მემკვიდრეობის საფუძველზე განაგრძო ქართველი ხალხის არჩევანის - თანამედროვე სახელმწიფოს მშენებლობის, დემოკრატიის განვითარებისა და დასავლეთთან ინტეგრაციის გზა. გვეამაყება, რომ ჩვენი თაობა წინაპრების დანატოვარს უფრთხილდება და თავისი წვლილი შეაქვს ქვეყნის დამოუკიდებლობისა და ერთიანობის განმტკიცებაში. საკონსტიტუციო რეფორმა და საპარლამენტო დემოკრატიის გაძლიერება, მდგრადი ეკონომიკური განვითარება, თავდაცვისა და უსაფრთხოების სფეროში მიღწეული პროგრესი და ევროპული და ევროატლანტიკური ინტეგრაციისკენ გადადგმული ნაბიჯები - ეს არის ის, რითაც ვაგრძელებთ ჩვენი წინაპრების მიერ დაწყებულ საქმეს და ეს საქმე ბოლომდეა მისაყვანი.

მიუხედავად იმისა, რომ გრძელდება ჩვენი ტერიტორიების ოკუპაცია და ათასობით ჩვენს თანამოქალაქეს არ ეძლევა სახლში დაბრუნების საშუალება, საქართველოს აქვს პოზიტიური დღის წესრიგი და ქმედითი სახელმწიფო ინსტიტუტები, ჰყავს ღირსეული საზოგადოება და ძლიერი სტრატეგიული მეგობრები", - განაცხადა არჩილ თალაკვაძემ.