„გარკვეული საკითხები დასალაგებელი მაღალ დონეზე“ - „ოცნებიდან“ წასული დეპუტატები უკრაინის ელჩის დაბარებაში ცუდს ვერაფერს ხედავენ

პოლიტიკა - 16:14, 25 May, 2020

651

ელჩის, თეიმურაზ შარაშენიძის საგარეო საქმეთა სამინისტროში დაბარებას ეხმაურებიან დამოუკიდებელი დეპუტატები. თამარ ხულორდავა მიიჩნევს, რომ ელჩის გამოწვევა სამომავლო ურთიერთობებს ეხება და მასში ცუს ვერაფერს ხედავს.

"მე ვფიქრობ, ალბათ ელჩის გამოწვევა კონსულტაციებისთვის უკავშირდება იმას, რომ ახალ მიდგომებზე ჩამოვყალიბდეთ. ქვეყანამ ახალი ინსტრუქცია მისცეს ელჩს, იმასთან დაკავშირებით თუ როგორ გაგრძელდეს თანამშრომლობა უკრაინის ხელისუფლებასთან. ამაში მე პირადად ცუდს ვერაფერს ვერ ვხედავ," - აცხადებს თამარ ხულორდავა.

კიდევ ერთი დამოუკიდებელი დეპუტატი დიმიტრი ცქიტიშვილი ამბობს, რომ არის საკითხები, რომელიც უმაღლეს დონეზეა დასალაგებელი.

"რისკენ მივდივართ ჯერჯერობით არ ვიცი. ეს ადამიანი უკვე დანიშნულია, ის ადამიანი საქართველოს სამართლებრივი სისტემით არის აღიარებული როგორც დამნაშავე, იქ კიდევ მაღალი თანამდებობის პირია, რომელიც პერიოდულად ერთვება ქართულ პოლიტიკურ ცხოვრებაში. ამ შემთხვევაში ცოტა უფრო მნიშვნელოვნად არის ქვეყნებს შორის გარკვეული საკითხები დასალაგებელი უმაღლეს დონეზე,“ - განაცხადა დიმიტრი ცქიტიშვილმა.

მას შემდეგ, რაც საქართველოს მესმაე პრეზიდენტი მიხეილ სააკაშვილი უკრაინის რეფორმების აღმასრულებელი კომიტეტის ხელმძღვანელად დაინიშნა, 8 მაისს საქართველოს ხელისუფლების გადაწყვეტილებით, უკრაინაში საქართველოს ელჩი, თეიმურაზ შარაშენიძე თბილისში კონსულტაციებზე გამოიძახეს.