"გადაწყვეტილებებს იღებს ივანიშვილი, ეს ზურაბიშვილმაც დაადასტურა"- ჭიაბერაშვილი "ოცნების" სპიკერებს "მატყუარებს" უწოდებს

პოლიტიკა - 11:37, 20 May, 2020

381

"ევროპული საქართველოს" ერთ-ერთი ლიდერის ზურაბ ჭიაბერაშვილის თქმით, "ქართული ოცნების სპიკერები, უბრალოდ, "მატყუარები არიან" და მათი ტყუილი არაერთხელ გამოჩენილა თუნდაც განვილი თვეების განმავლობაში.

ამ განცხადებით დეპუტატი პრეზიდენტის მიერ გაკეთებულ კომენტარს ეხმაურება, რომლის მიხედვითაც საქართველოს პრეზიდენტის, სალომე ზურაბიშვილი აცხადებს, რომ პატიმრობაში მყოფი პოლიტიკოსების, უგულავასა და ოქრუაშვილის შეწყალების გადაწყვეტილების მიღების შემდეგ ბიძინა ივანიშვილი, გიორგი გახარია და არჩილ თალაკვაძე წინასწარ გააფრთხილა.

მისი თქმით, პოლიტპატიმრების გათავისუფლება ბიძინა ივანიშვილის გადაწყვეტილება იყო, "ქართული ოცნების" თავმჯდომარეს პოლიტპატიმრების გათავისუფლება საზოგადოებისა და ქართველი ხალხის საერთაშორისო პარტნიორების ერთობლივმა ძალისხმევამ აიძულა.

" ახლა ზურაბიშვილმა დაადასტურა, რომ იმას, რას იტყვის ქართული ოცნების რომელიმე სპიკერი რომელიმე დღეს, არანაირი მნიშვნელობა არ აქვს. გადაწყვეტილებებს იღებს ბიძინა ივანიშვილი... რა თქმა უნდა, ღრმად ვარ დარწმუნებული, რომ ზუსტად ასევე, როგორც გათავისუფლდა უგულავა და ოქრუაშვილი, გათავისუფლდება რურუაც და ეს იქნება იმ ერთობლივი ძალისხმევის შედეგი, რასაც იჩენს ქართული საზოგადოება და მისი მოკავშირე საერთაშორისო პარტნიორები", - ამბობს ჭიაბერაშვილი.

მისი თქმით, იყვნენ თუ არა ინფორმირებულები ივანიშვილის გადაწყვეტილების შესახებ არჩილ თალაკვაძე, მამუკა მდინარაძემ, თუ გია ვოლსკიმ, ეს მეათეხარისხოვანია.

"ისინი უბრალოდ არიან ქართული ოცნების სპიკერები, რომ დღეს ერთი თქვან, ხვალ მეორე და ზურაბიშვილის განცხადებამ ცხადი გახადა მათი არამარტო ტყუილი, არამედ ცხადი გახადა, რომ ისინი არც არაფერს წარმოადგენენ გადაწყვეტილების მიღების პროცესში", - დასძინა ჭიაბერაშვილმა.