ერთიანი ნაციონალური მოძრაობის წევრი, რომან გოცირიძე ეხმაურება ანონპროექტს, რომლის მიხედვით, შესაძლებელი იქნება შეზღუდვები დაწესდეს საგანგებო მდგომარეობის გამოცხადების გარეშეც.

ოპოზიციონერი პოლიტიკოსი აცხადებს, რომ ხელისუფლების მიერ დაგეგმილი ცვლილებები იქნება რეპრესიების, პოლიტიკური დევნისა და ადამიანის უფლებების შეზღუდვის ინსტრუმენტი.

"თქვენ საკარანტინო ღონისძიებებს, რომელიც ეხებოდა პიროვნებას, ერთ პერსონას და რომლის შეზღუდვა შესაძლებელი იყო ეპიდემიის ან მსგავსი მოვლენების დროს, დააუმატეთ ყველა შესაძლო შეზღუდვა, რაც კი დღეს მოქმედებს საქართველოში საგანგებო მდგომარების პირობებში და რომელიც განხორციელდა ან ხორციელდება კონსტიტუციით პარლამენტის ნებართვით. ფაქტობრივად მთავრობას მიეცით უფლება შეზღუდოს გადაადგილება, დაკეტოს ეკონომიკის ყველა დარგი, ჩაკეტოს ადამიანები სახლებში, ფაქტობრივად გააუქმოს ადამიანების თავშეყრისა და გამოხატვის კონსტიტუციური უფლება, ჩაკეტოს ქალაქები და ეს ისე გააკეთოს, რომ პარლამენტს არც კი ჰკითხოს", -მიმართა რომან გოცირიძემ ქართულ ოცნებას ბიუროს სხდომაზე.

გოცირიძე ფიქრობს, რომ ყველა შეზღუდვა პარლამენტთან უნდა შეთანხმდეს, წინააღმდეგ შემთხვევაში კი ეს ცვლილებები იქნება სერიოზული იარაღი მთავრობის ხელში, რომელიც შეიძლება ბოროტად გამოიყენონ.

"ძალიან უცნაური და გასაკვირია, რომ პარლამენტი ფაქტობრივად ეთიშება ქვეყნისთვის უმნიშვნელოვანეს და ამავე დროს, ძალიან სარისკო გადაწყვეტილებების მიღებას. პარლამენტი, ფაქტობრივად, ფარ-ხმალს ყრის, დელეგირებას აკეთებს ისეთი უფლებებია, რომელიც შეუძლებელია, რომ აღმასრულებელ ხელისუფლებას ჰქონდეს ამ ზომით", - ამბობს გოცირიძე.