ქავთარაძის #58-ში მდებარე მდებარე, ახლადშენებულ კორპუსში ფანჯრების ამოჭრა დაავიწყდათ. 14 სართულიან საცხოვრებელ კორპუსში, რომლის მშენებლობა უკვე დასრულებულია და ორი ოჯახი უკვე ცხოვრობს, ყრუ კედელს ახლა თავიდან აგრევენ და ფანჯრებს ჭრიან.

თბილისის საკრებულოს წევრები ოპოზიციდან ლევან ხაბეიშვილი და ირაკლი ნადირაძე კორუფციულ გარიგებებზე საუბრობენ.

"ვხედავთ კალაძის ნოუჰაუს, რომ მან მისცა უფლება დაენგრიათ კედლები და ჩაესვათ შემდგომში ფანჯრები. თუმცა ეს არ არის ერთადერთი დარღვევა, რადგან აქ ჩასმის დროს მშენებლობა მიდიოდა მშენებლობის უსაფრთხოების ნორმების დარღვევებით" - ამბობს ირაკლი ნადირაძე, ნაციონალური მოძრაობის ფრაქციის თავმჯდომარე თბილისის საკრებულოში.

ოპოზიციში ასევე განმარტავენ, რომ კომპანია "ნიუ გრუპ +", რომელიც აღნიშნულ კორპუსს აშენებს, ეკუთვნის ლაშა ბაგრატიონს, რომელიც მერიის ყოფილი მაღალჩინოსნის ძმაა და კორპუსის მშენებლობის ნებართვაც გარკვეული დარღვევებითაა მოპოვებული. მათივე მტკიცებით, მშენებლობაც დარღვევებით მიმდინარეობს, თუმცა კომპანიამ მხოლოდ რამდენჯერმე მიიღო გაფრთხილება და ჯარიმა მისთვის არ დაუკისრებიათ, მას ხარვეზების გამოსასწორებლად 120 დღიანი ვადა მისცეს.

ნაციონალური მოძრაობის წევრის ლევან ხაბეიშვილის თქმით, მერიაში ზედამხედველობის სამსახურის უფროსის გიორგი ბაგრატიონის მუშაობისას დაუმტკიცეს ეს ობიექტი მის ძმას, ლაშა ბაგრატიონს.

კომპანია "ნიუ გრუპში" კატეგორიულად უარყოფენ კორუფციული ფაქტების არსებობას და ამბობენ, რომ როდესაც მშენებლობისას მიწა შეიძინეს, აქ დამტკიცებული პროექტი უკვე არსებობდა და მათ რამდენჯერმე მოუხდათ პროექტის გადაკეთება, ფანჯრების მოგვიანებით ამოჭრაც ამ მიზეზით მოხდა.