თუ სასამართლოს არ მიუთითებენ, ესეც საკმარისია რურუას გათავისუფლებისთვის

თუ სასამართლოს არ მიუთითებენ, ესეც საკმარისია რურუას გათავისუფლებისთვის - ადვოკატი

პოლიტიკა - 15:32, 18 May, 2020

412

"მთავარი არხის" ერთ-ერთი მეწილის სასამართლო განხილვა 20 მაისს 10 საათისთვის გადაიდო. გიორგი რურუას ადვოკატი დიტო საძაგლიშვილი ამბობს, რომ "თუკი სასამართლოს არ ექნება მითითება, რა გააკეთოს, ესეც კი საკმარისია იმისთვის რომ სასამართლომ დაუყოვნებლივ გაათავისუფლოს.

მისი შეფასებით, ბრალდებულის გათავისუფლების შესახებ შუამდგომლობის არდაკმაყოფილება უკანონო გადაწყვეტილება იყო.

"ჩვენ თითქმის ყველა სხდომაზე ვაყენებთ რურუას გათავისუფლების მოთხოვნას და მომავალშიც ყველა შესაძლებლობას გამოვიყენებთ... დღევანდელ პროცესზე კიდევ ერთხელ გამოიკვეთა ბრალდების პოზიციის აბსურდულობა. უხერხულ მდგომარეობაში ჩააგდეს პატრულის თანამშრომელი, რომელმაც თქვა, რომ თითქოს ვინმე დავით დვალიშვილმა დაურეკა, რომელსაც იცნობს, თუმცა არ შეუძლია ფიზიკურად აღწეროს, მათ შორის არ იცის მაღალია თუ დაბალია, მსუქანია თუ გამხდარი. ეს ადამიანი მას არ იცნობს და ათქმევინეს, თითქოს ვინმე დვალიშვილმა სთხოვა ავტომობილის გაჩერება.

ყველაზე მნიშვნელოვანი გარემოება რაც პატრულის თანამშრომელმა განაცხადა, იყოს ის რომ მას ხელმძღვანელმა უთხრა, არ გაეკეთებინა სამხრე კამერა. ანუ განზრახ არ გააკეთებინა, რათა არ დაფიქსირებულიყო გიორგი რურუას დაკავება", - ამბობს საძაგლიშვილი.

საქმის პროკურორი, ვასილ სამხარაძე კი აცხადებს, რომ საქმეზე უმეტესი მოწმე ჯერ კიდევ დასაკითხია.

"პატიმრობაში დატოვების ძირითადი მიზეზი იყო ის გარემოება რომ ახალი შემამსუბუქებელი რაიმე არ არსებობს. ის საფრთხეები, რაც არსებობდა, ახალი დანაშაულის ჩადენის, მოწმეებზე ზემოქმედების, კვლავაც არის. ბრალდებამ უკვე 15 მოწმე დაკითხა და 24 კვლავაც დასაკითხია", - თქვა პროკურორმა.