მოჩვენებითი დაპირისპირება პრეზიდენტთან? - "ოცნებაში" ამბობენ, რომ ზურაბიშვილთან "პრინციპული აზრთა სხვადასხვაობა" აქვთ

პოლიტიკა - 14:18, 16 May, 2020

576

პოლიტპატიმრების გათავისუფლების საკითხი -"ქართული ოცნება" მეორე დღეა ამტკიცებს, რომ პრეზიდენტის გადაწყვეტილება, შეეწალებინა გიგი უგულავა და ირაკლი ოქრუაშვილი, მათთვის მოულოდნელი და შეუთანხმებელი იყო.

განცხადება დღეს "ქართული ოცნების" დეპუტატმა, რატი იონათამიშვილმა გააკეთა და თქვა, რომ პრეზიდენტის გადაწყვეტილებას კრიტიკულად აფასებს, მეტიც დეპუტატის თქმით, საპარლამენტო უმრავლესობის წევრი აცხადებს, რომ პრეზიდენტს და მმართველ გუნდს შორის პრინციპული აზრთა სხვადასხვაობაა.

"ვფიქრობ, სამართლიანობის დაცვა მოითხოვს იმას, რომ განურჩევლად ჩვენი სოციალური და პოლიტიკური სტატუსისა, ვინც იდენს დანაშაულს, მან პროპორციულად და სამართლიანად უნდა აგოს პასუხი ამ დანაშაულის ჩადენის გამო", - ამბობს იონათამიშვილი.
რაც შეეხება მოახლოებულ არჩევნებს, იონათამიშვილი ოპოზიციის დამარცხებაში დარწმუნებულია.
"რაც შეეხება, ოპოზიციის ამ ნაწილს, ვფიქრობ, რომ არ არსებობს არც საარჩევნო სისტემა, არც ფორმულა ბუნებაში ისეთი, რომლის პირობებშიც მათ რაიმე წარმატების მიღწევის რესურსი ჰქონდეს არჩევნებში და იმასაც აღვნიშნავ, რომ საბოლოოდ საზოგადოება არჩევნების გზით აკანონებს სამართლიანობას და დარმწუნებული ვარ, რომ ჩვენი მოსახლეობა დაუსვამს წერტილს ამ დისკუსიებს", - განაცხადა რატი იონათამიშვილმა.

ზურაბიშვილმა ირაკლი ოქრუაშვილი და გიგი უგულავა გუშინ შეიწყალა.