ელჩები უგულავას და ოქრუაშვილის გათავისუფლებას ეხმაურებიან - „ეს არის 8 მარტის შეთანხმების შესრულებაში შეტანილი უმთავრესი წვლილი“

პოლიტიკა - 00:48, 16 May, 2020

838

პრეზიდენტის მიერ გიგი უგულავას და ირაკლი ოქრუაშვილის გათავისუფლებას ეხმაურებიან ოპოზიციასა და მმართველ გუნდს შორის დიალოგის ფასილიტატორები და ერთობლივ განცხადებას ავრცელბენ. დიპლომატები პოლიტიკური ლიდერების გათავისუფლებას მიესალმებიან და აცხადებენ, რომ გადაწყვეტილება არის 8 მარტის შეთანმხმების შესრულებაში შეტანილი უმთავრესი წვლილი.

„მივესალმებით საქართველოს პრეზიდენტის დღევანდელ გადაწყვეტილებას, გამოეყენებინა საკონსტიტუციო უფლებამოსილება ქვეყანაში პოლიტიკური პოლარიზაციის განმუხტვისა და თავისუფალი, სამართლიანი და გამჭვირვალე საარჩევნო პროცესისთვის უფრო ხელსაყრელი პოლიტიკური გარემოს შესაქმნელად.

ჩვენ, პოლიტიკური დიალოგის ფასილიტატორებს, მიგვაჩნია, რომ ეს გადაწყვეტილება ასევე არის 8 მარტის შეთანხმების შესრულებაში შეტანილი უმთავრესი წვლილი.

მტკიცედ მოვუწოდებთ ყველა მხარეს, სრულად განახორციელონ შეთანხმება მისი შინაარსის და სულისკვეთების დაცვით და საკუთარი როლი შეასრულონ საკონსტიტუციო ცვლილებებისა და საარჩევნო რეფორმის კანონმდებლობის წარმატებით მიღებაში, შემოდგომაზე თავისუფალი და სამართლიანი არჩევნების ჩასატარებლად.

კვლავ ყურადღებით დავაკვირდებით 8 მარტის შეთანხმების ყველა ასპექტთან დაკავშირებულ სამომავლო წინსვლას“ - ნათქვამია დიპლომატების ერთობლივ განცხადებაში, რომელიც აშშ-ის საელჩოს ფეისბუქის გვერდზეა განთავსებული.