"ხელისუფლებამ ამომრჩევლის მოსყიდვა დაიწყო" - ოპოზიციის სკანდალური ბრალდება

პოლიტიკა - 12:29, 15 May, 2020

578

ქუთაისის საკრებულოს "ნაციონალური მოძრაობის" ფრაქციის თავმჯდომარე "ქართულ ოცნებას" ამომრჩევლის მოსყიდვაში ადანაშაულებს.
ოპოზიციის ინფორმაციით, მმართველმა გუნდმა კორონავირუსის ეპიდემიის შედეგად დაზარალებული ადამიანების სია წინასწარ შეადგინა, სადააც მათი მხარდამჭერები ფიქსირდებოდნენ.

"ქართული ოცნების" წევრმა, მარეხი ნიჟარაძემ ინტერვიუში აღიარა, რომ სანამ პრემიერი გახარია საზოგადოებას გააცნობდა თვითდასაქმებულებისათვის 300 ლარიან დახმარების შესახებ, მანამ "ქართული ოცნების" მიერ, წინასწარ იქნა შედგენილი მათი მხარდამჭერების სიები, რომელთა დახმარებასაც აპირებდნენ. სწორედ ამის გამო, ხელისუფლება 840 ათასი თვითდასაქმებულის ნაცვლად აპირებს, მხოლოდ 240 ათასის დახმარებას.

ეს ინტერვიუ მან ტელეკომპანია "რიონს" მისცა იმ დღესვე, როდესაც ეს ინიციატივა გაჟღერდა. ინტერვიუ ადასტურებს, რომ "ქართული ოცნება" გეგმავს ბიუჯეტიდან გამოყოფილი თანხების დახარჯვას პარტიული შეხედულებების მიხედვით.

"ჩვენ მივიჩნევთ, რომ ეს არის სისხლის სამართლის დანაშაული და მოვითხოვთ, აღნიშნულ ფაქტზე სასწრაფოდ დაიწყოს გამოძიება და დაიკითხონ ქუთაისის საკრებულოს ის წევრები და ქართული ოცნების აქტივისტები," - განაცხადა გიგა შუშანიამ.