"დახმარებასა და ენმ-ის ძმაკაცების ციხიდან გამოშვებას შორის ტოლობა არ არის"- მათიკაშვილი საერთაშორისო კრიტიკაზე

პოლიტიკა - 14:29, 14 May, 2020

436

"ქართული ოცნების" ერთ-ერთი ლიდერი დავით მათიკაშვილი ევრონესტის საპარლამენტო ასამბლეაში ევროპარლამენტის დელეგაციის თავმჯდომარის, ანდრიუს კუბილიუსის განცხადებას ეხმაურება, რომლის მიხედვითაც „საქართველო ევროკავშირისგან 500 მილიონი ევროს ფინანსურ დახმარებას მიიღებს, სანაცვლოდ კი დაპირებული საარჩევნო და სასამართლო რეფორმები უნდა განხორციელდეს“.

"არ შეიძლება დახმარებასა და „ნაციონალური მოძრაობის“ ძმაკაცების ციხიდან გამოშვებას შორის რაიმე სახის ტოლობა დაფიქსირდეს", - ამბობს მმართველი გუნდის წარმომადგენელი ევროპარლამენტარის საპასუხოდ.

"სწორედ ეს არის ნაციონალური მოძრაობის მიზანი. ისინი ღიად აცხადებენ, რომ ჩვენს ძმაკაცებს თუ არ გამოუშვებენ ციხიდან, ჩვენ ყველა საშუალებას - ტყუილის და ძალადობის კუთხით, ვიხმართ იმისთვის, რომ ჩვენს მიზანს მივაღწიოთ, რასაც ისინი ვერ შეძლებენ. 2020 წლის არჩევნებზე ქართველი ხალხი კიდევ ერთხელ საკადრის პასუხს გასცემს ენმ-ს და მის სატელიტებს.

ნაციონალური მოძრაობა დღეს უკვე ღიად აცხადებს, რომ გამოიყენებს ყველა საშუალებას იმისთვის, რომ მოვიდეს ხელისუფლებაში. ეს საშუალებები არის ტყუილი და ძალადობა, რაც საზოგადოებას ძალიან კარგად ახსოვს. შესაბამისად, „ნაციონალური მოძრაობა“ ვერ შეძლებს იმას, რომ საქართველოსა და ევროკავშირის ურთიერთობაში რაიმე პრობლემა შექმნას, - აცხადებს დავით მათიკაშვილი.