საქართველოს ელჩი უკრაინაში თეიმურაზ შარაშენიძე, რომელიც მიხეილ სააკაშვილის თანამდებობაზე დანიშვნის საკითხთან დაკავშირებით საქართველოში კონსულტაციებისთვის გამოიწვიეს, ქვეყანაში უკვე დაბრუნდა, თუმცა საკარანტინო ზონაშია.

„ვიმყოფები საკარანტინო ზონაში სხვა მგზავრებთან ერთად. ველოდები ტესტის აღებას და გამოკვლევის შედეგებს“, – განაცხადა მან.

თეიმურაზ შარაშენიძის თქმით, წამოსვლისას გამართა შეხვედრა უკრაინის საგარეო საქმეთა სამინისტროში და გადასცა ქართული მხარის პოზიცია.

„ელჩის გამოძახება კონსულტაციებზე დიპლომატიაში მიღებულია. ჩვენს პარტნიორებს ჩვენი ეს ნაბიჯი არ გაჰკვირვებიათ და გარკვეულად გაგებითაც კი მოეკიდნენ. რეაგირება იყო, რომ უკრაინის მხარე ღებულობს პროტესტის ამ ფორმას და ის არ გამოიწვევს თავისი მხრიდან ელჩს და ყველანაირ ძალისხმევას იხმარს, რომ შენარჩუნდეს და გაღრმავდეს ჩვენი ურთიერთობები...ველოდები საკარანტინო ვადის დამთავრებას და შემდეგ გაიმართება კონსულტაციები. მივიღებ შესაბამის მითითებებს“, განაცხადა თეიმურაზ შარაშენიძემ.

შეგახსენებთ, უკრაინაში საქართველოს ელჩი კონსულტაციებისთვის მას შემდეგ გამოიძახეს, რაც უკრაინის რეფორმების აღმასრულებელი კომიტეტის თავმჯდომარის თანამდებობაზე მიხეილ სააკაშვილის დანიშნეს.