ქართველი ამომრჩევლისა და ცივილიზებული სამყაროს კიდევ ერთხელ "გადაგდება" - "ივანიშვილს ეს ძალიან მძიმედ დაუჯდება"- შაშკინი მოსალოდნლ საფრთხეებზე საუბრობს

პოლიტიკა - 14:27, 11 May, 2020

663

ბიძინა ივანიშვილის გუნდი პოლიტიკური პატიმრების გათავისუფლებას არ აპირებს. ხელისუფლება აცხადებს, რომ მსგავსი შეთანხმება 8 მარტის შეხვედრებზე არ დადებულა.

"ქართული ოცნების" ლიდერებმა დღეს განცხადებები ერთი მეორეს მიყოლებით გააკეთეს შეხვედრის მონაწილე ელჩებს მიმართეს.

მმართველი გუნდი ხელისუფლებასა და ოპოზიციას შორის 8 მარტის მოლაპარაკებების ფასილიტატორ ელჩებს მოუწოდებს, საჯაროდ დაადასტურონ, რომ ხელისუფლებას პრეზიდენტისთვის, სასამართლოსა და პროკურატურისთვის მიმართვისა და გიგი უგულავას, ირაკლი ოქრუაშვილისა და გიორგი რურუას გათავისუფლების ვალდებულება არ აუღია.

მმართველი პოლიტიკური პარტიის გადაწყვეტილება უკვე შეფასდა, როგორც ქართველი ამომრჩევლისა და ცივილიზებული სამყაროს "გადაგდების" მცდელობად.

სააკაშვილის საპრეზიდენტო ბიბლიოთეკის დირექტორი დიმიტრი შაშკინი "ნიუპოსტთან" აცხადებს, რომ ივანიშვილი ამ განცხადებით, შეგნებულად აფუჭებს დასავლეთთან ურთიერთობას.

"ქართული ოცნება და ბიძინა ივანიშვილი, მიზანმიმართულად, გეგმიურად, შეგნებულად აფუჭებს დასავლეთთან ურთიერთობას. საქართველოს ურთიერთობას უფუჭებენ დასავლურ, ცივილიზებულ სამყაროსთან.

მინდა შეგახსენოთ, რომ როცა გიორგი გახარიამ, ბიძინა ივანიშვილის ბრძანებით, რუსთაველის გამზირზე შეკრებილ ახალგაზრდებს თვალები დათხარა, მაშინ "ქართული ოცნების" მთავარი დაპირება პროპორციულ საარჩევნო სისტემაზე გადასვლა იყო. სწორედ ეს მესიჯი ჩაიტანა, ბიძინა ივანიშვილის მიერ პრეზიდენტად დანიშნულმა სალომე ზურაბიშილმა გაეროში. მან უმაღლესი ტრიბუნიდან დასავლურ სამყაროს ამის გაკეთებას დაჰპირდა. ბიძინა ივანიშვილმა ეს პირობა გაეროს ტრიბუნიდან ზურაბიშვილის პირით დადო. თუმცა ამან ხელი არ შეუშალა ოლიგარქს გადაეგდო ქართველი საზოგადოება, და ასევე დასავლური ცივილიზებული სამყარო. მას შემდეგ რაც, ამ "გადადგების" შემდეგ პოლიტიკური ვითარება დაიძაბა, ბიძინა ივანიშვილმა და მმართველმა პარტიამ დახმარებისთვის ისევ დასავლეთს მიმართეს, სთხოვეს, დიპლომატებს ჩართულიყვნენ ოპოზიციასთან მოლაპარაკების საქმეში. იმის გამო, რომ ოპოზიცია პატივს სცემს დასავლურ სამყაროს, ელჩების პატივისცემის ნიშნად, ხელისუფლების ოპონენტებმა მოლაპარაკებების მაგიდაზე დაჯდომის გადაწყვეტილება მიიღეს. ეს შეხვედრები კონკრეტული გარანტიით დასრულდა, რომ შეთანხმება უნდა შესრულებულიყო ქართული ოცნების მხრიდან.

როგორც კი საქართველოში კორონავირუსის პანდემია დაიწყო, მმართველმა პარტიამ კვლავ დაიწყო მცდელობა, ამ პოლიტიკურ პროცესში ქართველი ერი და დასავლური სამყარო მეორედ გადააგდოს. პირველ ჯერზე ივანიშვილმა დასავლეთიდან, განსაკუთრებით კი აშშ-იდან მკაფიო გზავნილი და გაფრთხილება მიიღო, თუმცა როგორც ვთქვი, ამას მეორედ აკეთებს.

ეს ხდება იმ ფონზე, რომ დიპლომატებმა მკაფიო და პირდაპირი განცხადებები გააკეთეს, რომ 8 მარტის შეთანხმება უნდა შესრულდეს. დღეს კი ქართულმა ოცნებამ პარლამენტის თავმჯდომარის სახელით პირდაპირ თქვა, რომ შეთანხმების შესრულებას არ აპირებენ. არჩილ თალაკვაძე იმდენად ამაზრზენად იტყუება, და ყველაფერს ოპოზიციას აბრალებს.

ამ გადაწყვეტილებით ივანიშვილი ძალიან ცუდ მდგომარეობაში აყენებს როგორც ამერიკულ ასევე ევროკავშირის მხარეს, რომლებიც ამ შეთანხმების შესრულების გარანტორები იყვნენ. ამას კი ივანიშვილი და მისი გუნდი მიზანმიმართულად აკეთებს, რომ მერე ქართველ ერს უთხრან, რომ ერთადერთი გზა, რომელიც რჩება ეს რუსეთთან დათმობისა და დაჩოქების გზაა. ქართველი საზოგადოების მოთხოვნა, რუსეთთან, ოკუპანტ ქვეყანასთან მეგობრობა არ არის. ქართველებს ნატოსა და ევროკავშირში გაწევრიანება სურთ. საქართველოს მოსახლეობას ნორმალურ, ცივილიზებულ ქვეყნების გვერდით ყოფნა უნდა და არა რუსეთთან. ვენესუელას და სირიის გარდა, მსოფლიოში არ დარჩა არცერთი ქვეყანა, ვისაც რუსეთთან მეგობრობა სურს. ქართველმა ერმა თავისი გეოპოლიტიკური არჩევანი არაერთხელ გამოხატა და "ქართულ ოცნებას" და ბიძინა ივანიშვილს კიდევ ერთი გადაგდება ძალიან ძვირად დაუჯდება"- აცხადებს დიმიტრი შაშკინი.