"ეს ხელისუფლებისთვის განაჩენია" - ოპოზიცია Freedom House-ის ანგარიშს ეხმაურება

პოლიტიკა - 12:42, 06 May, 2020

593

Freedom House-ის განაჩენი საქართველოს ხელისუფლებას - ასე აფასებენ "ქართული ოცნების" ოპონენტები საერთაშორისო ორგანიზაციის უმწვავეს ანგარიშს, რომელიც დღეს გამოქვეყნდდა.

"გასაკვირი არ არის, რომ ფრიდომ ჰაუსის ანგარიშში გაუარესებულია საქართველოს ყველა ინდიკატორი, ამისთვის არის ყველა კომპონენტი. ესაა პოლიტიკური მიზნებისთვის მართლმსაჯულების გამოყენება, რასაც ივანიშვილი მუდმივად აკეთებს და მეორეა ის, რომ ივანიშვილმა არ მიიღო საკონსტიტუციო ცვლილებები, რომლითაც ქვეყანა სრულად გადავიდოდა პროპორციულ საარჩევნო სისტემაზე", - განაცხადა "ერთიანი ნაციონალური მოძრაობის" ერთ-ერთმა ლიდერმა თინა ბოკუჩავამ.

Freedom House-ის ანგარიში, რომელშიც საქართველოს რეიტინგი კიდევ გაუარესებულია, პირდაპირ არის განაჩენი ხელისუფლებისთვის -აცხადებს „ევროპული საქართველოს“ წევრი სერგი კაპანაძე.

მისი თქმით, ანგარიშში ყველა პრობლემაზეა საუბარი და ის ადეკვატურად აფასებს ხელისუფლების ქმედებებს.

„იქ საუბარია ზუსტად იმაზე, რაც არის საქართველოს ხელისუფლება, ანუ ხელისუფლება, რომელიც უტევს ოპოზიციას, რომელმაც ხელში ჩაიგდო სასამართლო სისტემა და იყენებს მას პოლიტიკური მიზნებისთვის, ხელისუფლება რომელიც იყენებს ექსტრემისტულ დაჯგუფებებს და მათ მიერ განვითარებულ მესიჯ-ბოქსს. ამ ყველაფერში Freedom House-მა ამხილა საქართველოს ხელისუფლება და პრაქტიკულად ეს ნიშნავს იმას, რომ ჩვენ გვყავს ხელისუფლება, რომელიც არ არის ანგარიშვალდებული ხალხის მიმართ და რასაც აკეთებს ფასდება ადეკვატურად საერთაშორისო თანამეგობრობის მიერ. აქ არის საუბარი ყველა იმ პრობლემაზე, რომელიც ბოლო ერთი წლის განმავლობაში საქართველოს ხელისუფლებამ დაატრიალა ქვეყნის შიგნით, დაწყებებული პროპორციულ სისტემაზე საზოგადოების გადაგდებით, გაგრძელებული და დამთავრებული ისეთი ჯგუფების მხარდაჭერით, რომლებიც პირდაპირ აღვივებენ ფაშისტურ -ექსტრემისტულ და პრორუსულ ნარატივს ქვეყნის შიგნით,“ - აცხადებს სერგი კაპანაძე.