აზიის განვითარების ბანკი თვითმმართველობის რეფორმის განხორციელბაში საქართველოს ტექნიკურ დახმარებას გაუწევს - ამის შესახებ დღეს საქართველოს რეგიონული განვითარებისა და ინფრასტრუქტურის მინისტრის პირველ მოადგილესთან, თენგიზ შერგელაშვილთან შეხვედრისას აზიის განვითარების ბანკის მუდმივმა წარმომადგენელმა საქართველოში, ქეითი ჯულიანმა და აზიის განვითარების ბანკის ცენტრალური და დასავლეთ აზიის ფინანსური სექტორისა და ვაჭრობის სახელმწიფო მართვის განყოფილების დირექტორმა, ბეტი ვილკინსონმა განაცხადეს.

სტუმრებმა დიდი ინტერესი გამოხატეს თვითმმართველობის რეფორმისადმი და მინისტრის მოადგილისგან მიიღეს დეტალური ინფორმაცია დაგეგმილი ცვლილებების ძირითადი მიმართულებების თაობაზე. თენგიზ შერგელაშვილმა ხაზი გაუსვა იმას, რომ რეფორმის მიზანს წარმოადგენს რეალური თვითმმართველობის შექმნა, ადგილობრივი თვითმმართველობებისთვის იმ უფლებების გადაცემა, რომელიც, ბუნებრივად, მათი უფლებებია.

„წყალმომარაგება, ინფრასტრუქტურის მოწესრიგება, შიდა გზები, ნარჩენების მართვა - ეს ის სფეროებია, რომელიც თვითმმართველობებმა უნდა მართონ,“ - განაცხადა საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ, - „იმ კანონმდებლობით, რომელიც ახლა მოქმედებს, სოფლის გზის მოწესრიგებაც კი ცენტრალურ დონეზე გადასაწყვეტი საკითხია. ეს არ არის სამართლიანი მიდგომა და ახალი კოდექსი, სხვა ბევრ ხარვეზთან ერთად, თვითმმართველობის ამ ხარვეზსაც გამოასწორებს.“

თვითმმართველობის ახალი კოდექსი საქართველოს მთავრობამ გასულ კვირაში დაამტკიცა. დოკუმენტი განსახილველად საქართველოს პარლამენტშია შესული. პარალელურად, საქართველოს რეგიონული განვითარებისა და ინფრასტრუქტურის სამინისტრო, ქვეყნისს ხვადასხვა რეგიონებში, დოკუმენტის საჯარო განხილვებს მართავს.