ახალი დეტალები ყინწვისში, მამებს შორის მომხდარ დაპირისპირებაზე: "მივხვდი, რომ გვესროდნენ ცეცხლსასროლი იარაღიდან..."- რა ჩვენება მისცა მამა საბამ

სამართალი - 14:26, 05 May, 2020

1957

ყინწვისში, მამებს შორის მომხდარი დაპირისპირების შესახებ ახალი დეტალები ხდება ცნობილი.

დაზარალებული მღვდელმთავარი, მამა საბა ჟღენი პოლიციისთვის მიცემულ ჩვენებაში მომხდარს დეტალურად იხსენებს.

საბა ჟღენტი გამოძიებისთვის მიცემულ ჩვენებაში ირწმუნება, რომ არ დაუნახავს ვინ გაისროლა 20 აპრილს მისი მიმართულებით.

"გაისმა დიდი, სავარაუდოდ იარაღის გასროლის ხმა. მე მაშინვე მივხვდი, რომ გვესროდნენ ცეცხლსასროლი იარაღიდან. სროლა ხორციელდებოდა ჩვენგან მარჯვენა მხარეს თუ საიდან, ეს ვერ დავინახე. ასევე ვერ დავინახე პირი ვინც გვესროდა. სროლაზე ავტომობილი არ გამიჩერებია, სწრაფი გზით გავაგრძელე გზა. გავცდით 150-200 მეტრით, რა დროსაც მანქანაზე დაგვეშვა საბურავი. გავაჩერე მანქანა, გადმოვედი, შევცვალეთ საბურავი ხოლო დაზიანებული საბურავი ჩავდეთ ავტომობილში.

სროლის დროს დაზიანდა ავტომანქანა, მინები, საქარე მინის ორი ადგილი. ასევე, ავტომანქანას უკან ორი ტყვია ჰქონდა მოხვედრილი. ჩვენ სროლის შედეგად არანაირი დაზიანება არ მიგვიღია. პირადად მე არანაირ სამედიცინო ექსპერტიზას არ ვსაჭიროებ. პიროვნება, რომელიც ჩვენი მისამართით ისროდა არ დამინახავს. ამის შემდეგ ჩვენგან ერთ-ერთმა დაურეკა მამა ეფრემს, რომელსაც სთხოვა მოსულიყო ჩვენთან და წავეყვანეთ თავისი ავტომანქანით, ვინაიდან მისი ავტომობილით გადაადგილება უფრო უსაფრთხო იქნებოდა"- აცხადებს დაზარალებული სასულიერო პირი ჩვენებაში.

რაც შეეხება ექსპერტიზის დასკვნას და შემთხვევის ადგილიდან ამოღებულ ვაზნების ფოტოებს. ექსპერტიზის დასკვნის თანახმად მასრებზე ანაბეჭდები არ იკითხება. მათ შორის არ გამოვლენილა ბრალდებული სასულიერო პირის დავით აქიაშვილის ხელის კვალი.

ცნობისთვის, მამა საბა ჟღენტი, ყინწვისში მომდარ შემხვევას მედიასთან საერთოდ უარყოფდა.

ყინწვისში მომხდარი დაპირისპირების შესახებ ინფორმაცია პირველმა, "ნიუპოსტმა" წყაროზე დაყრდნობით - 22 აპრილს გაასაჯაროვა.

შინაგან საქმეთა სამინისტრო, ისევე როგორც საპატრიარქო მომდევნო ერთი კვირის მანძილზე დუმდა, ბოლოს კი გომელაურის უწყებამ მომხდარი დაადასტურა და სასულიერო პირის დაკავების შესახებ განცხადება გაავრცელა.

განცხადებაში არაფერია ნათქვამი, სააღდგომო ტრაპეზზე მომხდარ დაპირისპირების ეპიზოდზე, უწყება ოფიციალურ წერილში წერს, რომ დაკავებულმა გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

ჩვენი წყარო, ყვება, რომ მამა დავითსა და არქიმანდრიტ საბას შორის დაპირისპირება, მონასტრის ტერიტორიაზე, ტრაპეზობისას დაიწყო, საქმე იქამდე მივიდა, რომ საჭირო რომ საჭირო გახდა მეუფე იობის ჩართვაც, რომელიც მოწოდებული ინფორმაციის თანახმად, დაპირისპირებულებს აშველებდა.

მონასტერში მომხდარის შესახებ საუბრისგან თავის იკავებენ, ამბობენ მხოლოდ იმას, რომ ინცინდენტში მეუფის თანდასწრებით არ მომხდარა.

კობა კობაიძის, იგივე მამა დავით აქიაშვილის სასამართლო პროცესი უახლოეს პერიოდში გაიმართება. მანამდე კი ყინწვისის მონასტრის წინამძღვარი დუმილის უფლებას იყენებს.