"ოცნება წინასაარჩევნო კამპანიაშია, ივანიშვილის გუნდი საგანგებო მდგომარეობას პოლიტიკური და კორუფციული მიზნებისთვის იყენებს"- ოპოზიცია

პოლიტიკა - 12:21, 05 May, 2020

1030

ოპოზიცია ეჭვობს, რომ ივანიშვილის გუნდი, საგანგებო მდგომარეობის და კომენდანტის საათის გახანგრძლივებას გეგმავს და პანდემიას პოლიტიკური მიზნებისთვის იყენებს.

ხელისუფლების ოპონენტები აღნიშნავენ, რომ მმართველი გუნდი მოსახლეობას პანდემიით აშინებს.

"ნაციონალური მოძრაობის" ერთ-ერთი ლიდერი ხატია დეკანოიძე აცხადებს, რომ ხელისუფლება საგანგებო მდგომარეობას კორუფციული მიზნების განსახორციელებლად იყენებს.

პარტიის წევრი ხელისუფლების მხროდან დაწყებულ წინასაარჩევნო კამპანიაზეც მიუთითებს.

"საგანგებო მდგომარეობას ხელისუფლება იყენებს პოლიტიკური და კორუფციული მიზნების განსახორციელებლად და მათ შორის უკვე აქტიურად არს ჩართული წინასაარჩევნო კამპანიაში. საგანგებო მდგომარეობის ორმაგი სტანდარტები არ ეხებათ ქართულ ოცნებასთან დაახლოებულ პირებს"- ამბობს დეკანოიძე.

მისი თქმით, კომენდანტის საათი უნდა მოიხსნას და აღდგეს გადაადგილება.

"ხელისუფლება რესურსებს ვერ იყენებს, კომენდანტის საათი მათ მხოლოდ ზედმეტი კონტროლისთვის სჭირდებათ, მაგრამ ეს კონტროლი ხორციელდება მხოლოდ კანონმორჩილი მოქალაქეებისთვის"- განმარტავს ხატია დეკანოიძე.

"ევროპული საქართველოშიც" ფიქრობენ, რომ ხელისუფლებამ ბიზნესს და მოქალაქეებს აბსურდული შეზღუდვები დაუწესა.

"საზოგადოების დაცინვაა, თითქოს ვირუსი არჩევდეს 9 საათამდე შეიკრიბებიან მოქალაქეები და იქეიფებენ, თუ 9 საათის შემდგომ. არანაირი გონივრული ახსნა კომენდანტის საათს არ გააჩნია, ისევე როგორც ქალაქების ჩაკეტვასა და შეზღუდვას მანქანებში მსხდომი პირების რაოდენობის მხრივ, - ამბობს აბესაძე.

მმართველ გუნდში კი არ გამორიცხავენ, რომ საგანგებო მდგომარეობა ორი კვირით ან ერთი თვით გახანგრძლივდეს.

"თუნდაც ერთი თვით რომ გახანგრძლივდეს საგანგებო მდგომარეობა, ამ შემთხვევაშიც გვაქვს შესაძლებლობა, რომ საკონსტიტუციო ცვლილებების მიღება შევძლოთ. 31 ოქტომბრის არჩევნებს არანაირი საფრთხე არ ემუქრება. ვაკვირდებით რა მდგომარეობა იქნება, თუ გახანგრძლივდა საგანგებო, ივლისში მაინც გახდება შესაძლებელი საკონსტიტუციო ცვლილებების მიღება,"- განაცხადა ირაკლი კობახიძემ.