ავტონაწილებით ვაჭრობა დასაშვები არ არის- საქმიანობების რა ნაწილში მოისხნა შეზღუდვა დღეიდან

პოლიტიკა - 10:09, 05 May, 2020

1552

საქართველოს მთავრობის ადმინისტრაციის განმარტებით, დღეიდან ავტონაწილებით ვაჭრობა დასაშვები არ იქნება.

როგორც ირკვევა, ავტონაწილებით ვაჭრობა მხოლოდ ონლაინ და ავტოტექმომსახურების გამწევ ადგილას იქნება დასაშვები, თუ ამ მასალის გაყიდვა ავტოტექმომსახურების გაწევის შემადგენელი ნაწილია.

რაც შეეხება ავტოტექმომსახურების დაშვებას, დაშვება გულისხმობს მოტოციკლეტების, მოპედების და ველოსიპედების ტექმომსახურებასაც.

ავტოტექმომსახურების ცენტრების და ავტოსამრეცხაოების მიერ სავალდებულოა, რომ დაცული იყოს შესაბამისი წესები - პირბადეები, სადეზინფექციო საშუალებები და ა.შ.

ცნობისთვის, ეკონომიკური გახსნის გეგმის მეორე ეტაპით გათვალისწინებული საქმიანობების ნაწილი დასაშვები ხდება 5 მაისიდან. კერძოდ, დღეიდან დასაშვებია:

ყველა სახის სამშენებლო-სარემონტო სამუშაოები, სამშენებლო მასალების წარმოება და სამშენებლო ზედამხედველობასთან დაკავშირებული საქმიანობა; თუმცა, მთავრობის ადმინისტრაციის განმარტებით, სამშენებლო სამუშაოების ნაწილში შეზღუდვების მოხსნა სამშენებლო მასალის რეალიზაციას არ ეხება და რეალიზაცია დასაშვებია მხოლოდ ონლაინ.

ასევე, ხვალიდან დასაშვებია ავტოტექმომსახურება და ავტოსამრეცხაოების საქმიანობა;

ქუთაისში და ბათუმში შესვლა და გასვლა ყოველგვარი გამონაკლისის გარეშე, თუმცა აღნიშნულ ქალაქებში კომენდანტის საათის მოქმედება ძალაში რჩება.