კორონავირუსი, საგაბგებო ბიუჯეტი და ხელისუფლების ანტიკრიზისული გეგმა - ნაციონალური მოძრაობა საპარლამენტო ბოიკოტს დროებით წყვეტს

პოლიტიკა - 12:05, 04 May, 2020

448

ნაციონალური მოძრაობა საპარლამენტო ბოიკოტს დროებით წყვეტს - ინფორმაცია ფრაქციის თავმჯდომარემ, რომან გოცირიძემ პარლამენტში გამართულ ბრიფინგზე გააჟღერა.

ენმ გადაწყვეტილების მიზეზად ახალ კორონავირუსს და ანტიკრიზისუყლ გეგმას ასახელებს, რომელიც მათი თქმით გააზრებული და მოსახლეობაზე მორგებული არ არის.

„დღეს, როცა საგანგებო მდგომარეობის პირობებში პარლამენტი უნდა მუშაობდეს განსაკუთრებული დატვირთვით, როცა პარლამენტში უნდა იხილებოდეს უკიდურეს სიღარიბეში ჩავარდნილი ასობით ათასი ჩვენი მოქალაქისათვის მხარდაჭერის გეგმა, პარლამენტი არის ფაქტობრივად ნებაყოფლობით შვებულებაში გასული. საგანგებო მდგომარეობამ ქვეყნის წინაშე წარმოშვა უამრავი პრობლემა, შეჩერებულია კონსტიტუციის მრავალი ნორმა და მათ შორის ისეთი, რომელიც პირდაპირ იცავს ადამიანის უფლებებს. ქვეყანაში ირღვევა ადამიანის უფლებები და საგანგებო მდგომარეობის რეჟიმმა შექმნა უამრავი პრობლემა, მათ შორის, ელემენტარული არსებობის უფლება ჩამოერთვა ასობით ათას ჩვენს თანამოქალაქეს, რომელიც დარჩა უმუშევარი და გამოკეტილი საქართველოს ქალაქებში. დღეს არის განსაკუთრებული ვალი პარლამენტისა, რომ განახორციელოს თავისი მაკონტროლებელი და საზედამხედველო ფუნქციები აღმასრულებელ ხელისუფლებაზე. იმ ხელისუფლებაზე, რომელსაც დღეს გეგმაც კი არ აქვს წარმოდგენილი რეალური თუ როდის დაიწყებს სოციალური დახმარებების გაცემას. ევროპის ყველა სახელმწიფომ, ჩვენმა მეზობელმა ქვეყნებმა დიდი ხანია რაც ამ უმძიმესი კრიზისის პირობებში საკუთარ მოქალაქეებს გაუწიეს ფინანსური და სხვა სახის მხარდაჭერა,“- განაცხადა რომან გოცირიძემ.

ოპოზიცია მოუწოდებს პარლამენტის თავმჯდომარეს დაუყივნებლივ დაიწყოს საკანონმდებლო ორგანომ მუშაობა. რა თქმა უნდა დისტანციისა და ყველა ნორმის დაცვით.

„დღეს საქართველოს მთავრობა მექანიზმებზე ფიქრობს და არ იცის თუ როდის დაიწყება ის მწირი და უსამართლოდ გაწეული დახმარებების დარიგება, რომელსაც ასე ელოდება ხალხი. საქართველოს მთავრობამ 600 000 ჩვენი მოქალაქე, რომელსაც თვითდასაქმებულებს უწოდებენ, გაწირა შიმშილისთვის, ამიტომ პარლამენტმა უნდა იმსჯელოს საგანგებო ბიუჯეტზე, რომელიც დღემდე არ წარმოუდგენია მთავრობას. მთავრობა, რომელსაც თუკი ვენდობით, მაგრამ ხშირად ილუზიებში იმყოფებიან, აპირებს რამდენიმე მილიარდის დახარჯვას ისე, რომ არაფერს ეკითხება ხალხს, ვინაიდან პარლამენტი არის ხალხის წარმომადგენელი და პარლამენტის ნებართვით უნდა იყოს გაწეული ნებისმიერი ხარჯი და ნებისმიერი თეთრი უნდა იყოს აყვანილი კონტროლზე. მოვუწოდებთ საქართველოს პარლამენტის ხელმძღვანელობას, დაუყონებლივ დაიწყოს პარლამენტმა მუშაობა ჩვეულ რეჟიმში, დაუყონებლივ დაიწყონ კომიტეტებმა მუშაობა, პლენარულმა სხდომამ. ეს სავსებით შესაძლებელია იმ ნორმების დაცვით, რომელსაც ითვალისწინებს ვირუსის წინააღმდეგ ბრძოლის წესები. დისტანციის დაცვით პარლამენტი უნდა შეუდგეს საკუთარი უფლებამოსილების აღსრულებას, ხოლო მთავრობამ კეთილი ინებოს და დროზე წარმოადგინოს პარლამენტში საგანგაბო ბიუჯეტი და ანტიკრიზისული გეგმა,“- განაცხადა რომან გოცირიძემ.