"ეკლესიას უჭირს, მაგრამ ჩვენ უნდა გვახსოვდეს, რომ ეკლესია აღაშენა მაცხოვარმა და ბჭენი ჯოჯოხეთისანი ვერ მოერევიან მას"

"ეკლესიას უჭირს, მაგრამ ჩვენ უნდა გვახსოვდეს, რომ ეკლესია აღაშენა მაცხოვარმა და ბჭენი ჯოჯოხეთისანი ვერ მოერევიან მას" - ილია მეორე

რელიგია - 13:45, 03 May, 2020

2527

ჩვენ ვცხოვრობთ ურთულეს დროს, როცა ეკლესიებს უჭირს, როცა ხალხს უჭირს, მაგრამ ჩვენ უნდა გვახსოვდეს, რომ მადლი და წყალობა ღვთისა არ მოაკლდება ეკლესიას - ამის შესახებ სრულიად საქართველოს კათოლიკოს-პატრიარქმა ილია II-მ საკვირაო წირვის შემდეგ ქადაგებისას განაცხადა.
პატრიარქმა ქადაგებაში ყურადღება თამარ მეფესა და მის ღვაწლზეც გაამახვილა. მისი თქმით, თამარ მეფის ღვაწლი თანასწორია მენელსაცხებლე დედათა ღვაწლისა.
„სახელითა მამისათა და ძისათა და წმინდისა სულისათა. ქრისტე აღდგა! ქრისტე აღდგა! ქრისტე აღდგა! გილოცავ ამ დიდებულ დღესასწაულს, - დღეს არის მენელსაცხებლე დედების ხსენება. დღეს კიდევ ერთხელ უნდა გავიაზროთ ის, თუ რა გააკეთეს მენელსაცხებლე დედებმა, რამდენი გაბედული ნაბიჯი გადადგეს. იმ დროს, როცა მოციქულებმა დატოვეს ჯვარცმული მაცხოვარი, მენელსაცხებლე დედები ჯვართან იდგნენ და იქ იზიარებდნენ ტკივილს და მადლს მაცხოვრისას. მენელესაცხებლე დედებმა თავისი მხრებით იტვირთეს სიმძიმე ეკლესიისა, ისინი ქადაგებდნენ მთელ მსოფლიოში და ჩვენ ვმადლობთ და თაყვანს ვცემთ მათ ღვაწლს. შემთხვევით არ არის, რომ ჩვენმა წინაპრებმა თამარ მეფე მიაკუთვნეს მენელსაცხებლე დედებს და გაუთანასწორეს მისი - თამარ მეფის - ღვაწლი მენელსაცხებლე დედებისას.მარიამ მაგდალინელი და სხვები ხარობენ და ზეიმობენ აღდგომილ მაცხოვართან. მათი ლოცვა-კურთხევა შეგეწიოთ თქვენ და საქართველოს.ჩვენ ვცხოვრობთ ურთულეს დროს, როცა ეკლესიებს უჭირს, როცა ხალხს უჭირს, მაგრამ ჩვენ უნდა გვახსოვდეს, რომ მადლი და წყალობა ღვთისა არ მოაკლდება ეკლესიას. ეკლესია აღაშენა მაცხოვარმა და ბჭენი ჯოჯოხეთისანი ვერ მოერევიან მას.შეგეწიოთ მადლი და წყალობა ღვთისა! შეგეწიოთ სიხარული, სიყვარული ღვთისა!წყალობა და მადლი ღვთისა იყოს თქვენთან, ამინ!ჩვენთან არს ღმერთი!“ - სრულიად საქართველოს კათოლიკოს-პატრიარქ ილია II-ის ქადაგება მენელსაცხებლე დედათა კვირას.